Ish-ambasadori i Shqipërisë në Kosovë, Islam Lauka, ka komentuar debatin e hapur në Kosovë për një ndryshim kufijsh me Serbinë.

Në një lidhje me ‘Skype’ me emisionin ‘Kjo javë’, Lauka tha se qëndrimi i Tiranës zyrtare lidhur me këtë debat nuk ka unitet.

Sipas tij qëndrimi i presidentit Meta për këtë çështje është i prerë që nuk duhet të ketë ndryshim kufijsh, ndërsa Rama ka të njëjtin qëndrim si Putin.

Pjesë nga intervista:

Si ish ambasadori ynë në Kosovë, si e shihni qëndrimin e Tiranës zyrtare lidhur me këtë çështje?

Tirana zyrtare nuk është unike, në qëndrimin zyrtar. Sepse në rast se i referohemi presidentit Meta, ai ka një qëndrim të prerë të qartë kundër ndryshimeve territoriale. Sipas tij çështja e Kosovës është e mbyllur. Por, Putini dhe me konkretisht Edi Rama, i fut edhe pak mish dhie në gjuhën popullore. Ai nuk ka dal hapur në mbrojtje të kësaj teze por, në fjalimet e tij shpesh lavdëron autorët dhe mbështetësit e kësaj teze. Dhe së fundi, ju e dini me 26 nëntor tha që kush e kritikon Thaçin është tradhtar. Kjo nuk do më koment. Le për vrazhdësinë e shprehjes, se të kritikosh Thaçin nuk është tradhtar e as gomar në një kohë që përball kishte kryeministrin e Kosovës, që është kundërshtari numër një i idesë së ndryshimeve territoriale. Sepse Ramush Haradinaj thotë nëse futet kjo tezë, kufijtë vihen me luftë e ndryshohen me luftë. Unë mbështes qëndrimin parimor të presidentit natyrisht që jam kundër qëndrimit të Edi Ramës. Tirana zyrtare e pakta që duhet të bëjë është ti bëjë thirrje partive në Kosovë të shkojë për një fjalë.

Po qëndrimi i Vucic, lidhur me vizitën e tij në SHBA që nuk e përmendi këtë pjesë. . .

Halli i Serbisë për publikun është që Kosova u humb në ’99 me shpalljen e pavarësisë akoma më shume dhe Serbisë i iku fytyra. Tani Serbia, Beogradi thotë unë kam një kusht, që ta njoh si shtet të pavarur, dua të shpërblehem me diçka, për fytyrë në Botë të marr diçka, dhe këtë e ka konkretizuar. I ka vënë emrin e Veriut në lumin Ibër  e sipër, këtë ma jepni mua thotë dhe pastaj unë do t’ju njoh. Plus kësaj ka edhe një kusht tjetër që është fiksuar nga BE, që nuk Serbia nuk anëtarësohet në BE pa normalizuar marrëdhëniet me Kosovën. Dhe Vucic prapë thotë unë i normalizoj por më jepni diçka, se nuk kam fytyrë ti dal popullit me humbje. Kjo është logjika. Mesa gjykoj unë e vërteta është diku tjetër. Vucic dhe Beogradi e ka hallin te pasuritë e mbi tokës dhe të nëntokës së Veriut. Pjesa mbi lumin Ibër është një ndër kolonat më të fuqishme ekonomikisht, është Ujmani Kopaniku që po i kaloi Serbisë, Kosova mbetet zbuluar.

Në radhët e qytetarëve si po përjetohet ky debat?

Unë jetoj në Kosovë, me aq sa e njoh unë opinionin këtu, kjo çështje ka hapur shumë probleme. Dhe është një ndër të këqijat e mëdha, që Thaçi ka sjellë. Opinioni këtu e dënon dhe është kundër kësaj teze. Të gjithë mendojnë se kjo tokë është e larë me gjak, dhe ta nxjerrësh në pazar për interesa të Thaçit, kjo s’mund të vlerësohet pozitivisht. Por ka krijuar përçarje edhe mes popullit të Kosovës dhe Luginës se Preshevës. Ka krijuar një gjendje pritshmërie te ata, janë me mendje të ngritur, kur po bashkohemi si po bashkohemi është kollaj të thuash shkëmbim territoresh, po ai shkëmbim implikon fate njerëzish. Kosova nuk ka këllqe të durojë probleme shtesë, sepse edhe tani ka mjaft probleme. Detyra e Kosovës është të mbrojmë atë që kemi, me hy në luftë territoriale sot është me rrezik dhe Kosova nuk del e fituar. I fituar del  Beogradi, sepse na vjen apo jo ne mirë sot është në avantazh me Kosovën.