Prof. Dr. Tritan Kalo ka dhënë sot lajmin se për herë të pas më shumë se një viti pandemi, nuk është paraqitur asnjë i sëmurë me COVID-19 në Urgjencën e “Nënë Terezës”.

Ndërsa e sheh me optimizëm këtë situatë, Kalo paralajmëron se është shpejt për të folur me siguri në e fituam këtë betejë, por situate duket në rrugë të mbarë.

Mesazhi i Prof. Dr. Kalos në Fb:

“Njëzet e katër orëshi i parë pas datës 8 mars 2020 që në Shërbimin e Urgjencës së Sëmundjeve Infektive në QSUNT, nuk është paraqitur asnjë i sëmurë me Covid-19.

E fituam këtë betejë me flamën mbarëbotërore, pandeminë nga Sars-Cov2/Covid-19.

Shpejt për të folur me siguri, por kryesorja është se jemi në udhë të mbarë për të dalë nga tuneli i gjatë, ku po ecim prej 14 muajsh që nga mbrëmja e 8-9 marsit 2020.

Kemi ende plot të sëmurë në gjendje të rëndë në mjediset spitalore, po ashtu dhe jo pak të sëmurë që mjekohen në banesat e tyre.

Kemi humbur qindra e mijra të afërt, miq e shokë.

Kemi kaluar e po kalojmë momente shumë të trishta, por ne nuk jemi dorëzuar.

Vetndërgjegjësimi dhe vetkujdesja kurrë të mos na zbehet dhe të na mungojë edhe pas sodit.

MHD ( Maska - Higjena personale e kolektive - Distancimi fizik) mbeten shumë të efektshme në këtë betejë me armikun e padukshëm.

Vaksinimi po na ndihmon që të dalim sa më shpejt nga ky tynel, ndaj për asnjë dekikë mos nguroni të vaksinoheni ndaj infeksionit Sars-Cov2/Covid-19.

Mëndjeçarturit e gojështhururit kundër aplikimit të vaksinës kurrë nuk do të mbyllen, por nga shekujt populli na rikujton se “Një gur hedh budallai në lumë e duhen 1000 të mënçur për ta gjetur e nxjerrë atë nga ai”.

Duajeni dhe respektojeni sa më shumë veten si dhe ata që gjallojnë rreth jush.

Ne, mantelbardhët dhe stafi tjetër mjeksor jemi kurdoherë këtu në vijën e parë për t’u kujdesur dhe ndihmuar në përballjen tuaj me virusin jetëlëndues dhe jetëmarrës të Sars-Cov2/Covid-19.

Koha po punon për ne, që edhe me kujdesin e pamunguar ndaj vetëvetes, të mundemi t’i gëzojmë sa më mirë bukuritë e këtyre viseve të së bekuarës nënëlokes Shqipëri.

Together forever!!! “