Shkolla 9-vjeçare ‘Dëshmorët e Prishtinës’ në Shkodër ka hapur dyert këtë vit të ri shkollor, për të rinjtë e komunitetit rom e egjiptianë që nuk kanë kryer arsimin bazë të detyrueshëm.
Bako, 21 vjeç, është një prej nxënëseve të klasës ku zhvillohet programi i edukimit part/time për të rinjtë e komunitetit rom e egjiptian, që po zbatohet nga PNUD .
Ajo ndjek klasën e 9-të dhe pas mbarimit të shkollës, dëshiron të fillojë një kurs për kuzhinë pasi pasioni i saj është gatimi.
‘Shkollën e kam braktisur kur isha 10 vjeç.
Prindërit e mi nuk kanë bërë asnjë klasë ndaj dhe ne fëmijëve nuk na lanë të vazhdonim shkollën’, thotë vajza me droje dhe pak e tërhequr.
Në shkollën 9-vjeçare ‘Dëshmorët e Prishtinës’, ka dhe plot të rinj e të reja të moshave 16-35-vjeç që kanë rifilluar shkollën aty ku e lanë vite më parë, jo vetëm nga komuniteti rom e egjiptian.
Valentina 31 vjeç është një prej tyre dhe ndjek mësimet e klasës së 8-të.
Ajo është nga Puka, nënë e dy fëmijëve, e porsakthyer nga një periudhë e gjatë emigrimi në Greqi.
Valentina thotë se në Greqi nuk frekuentoi asnjë vit shkollën ndaj me rikthimin e saj në Shkodër ku ka krijuar familjen e saj, nisi të mësojë shkrim e këndim.
‘Kam pasur ëndrrat e mia si të gjithë vajzat e moshës sime, por emigrimi mi shoi.
Tani dua të rifitoj kohë, të mbyll studimet dhe më pas të ndjek kursin e parukerisë sepse dua të hap biznesin tim’.
Edhe Xhulio 19 vjeç, duket se ka fituar mbi paragjykimet e shoqërisë së tij.
Në klasë ka njohur plot miq e shokë, ndaj vjen çdo ditë dhe nuk braktis asnjë orë mësimi.
‘E lashë shkollën kur isha shumë i vogël, mblidhja kanaçe me prindërit.
Sot kam vendosur ta përfundoj shkollën, sepse s’dua të më quajnë analfabet’, thotë i riu egjiptian.
Projekti i edukimit me kohë të pjesshme për të rritur romë dhe egjiptianë bazohet në një urdhër të ngritur nga Ministria e Arsimit më 9 maj të këtij viti dhe është i shtrirë në Berat, Shkodër e Durrës.
Ky projekt zbatohet nga organizata ‘Qendra për të Drejtat e Grave të Romëve (RËRC) mbështetur nga projekti ‘Fuqizim Ekonomik dhe Social për Romët dhe Egjiptianët- shtysë për përfshirjen sociale’, financuar nga Bashkimi Evropian.
Për vitin akademik 2018-2019, në Shkodër, 28 të rritur (16 egjiptianë, 5 romë) po ndjekin programin në shkollën ‘Dëshmorët e Prishtinës’.
Rreth 83 të rinj romë dhe egjiptianë në Durrës, Berat e Shkodër janë regjistruar gjatë vitit 2016-2018 dhe ndjekin rregullisht klasat përmes këtij modeli arsimor.
Programe edukimi të pjesshme ofrohen dhe në Qendrën Komunitare Multifunksionale të Shkozës e cila menaxhohet nga bashkia e Tiranës.
Krahas programit të punësimit në fushën e riciklimit, rreth 50 anëtarë të familjeve rome që jetojnë në zonën e Lanabregasit, mësojnë të shkruajnë e të lexojnë në qendrën komunitare të Shkozës.
Kjo qendër ofron një model inovativ të shërbimeve të integruara me bazë në komunitet i cili është pilotuar në 4 rajonet që mbulohen nga projekti FESRE, Tiranë, Durrës, Berat, dhe Shkodër.
Me financimin e Bashkimit Evropian, disa ditë më parë, më 18 Tetor, u përurua në Shkodër dhe Qendra e re Komunitare Multifunksionale.
Qendra Komunitare Multifunksionale u identifikua si prioritet nga anëtarët e minoritetit dhe synon të mbështesë grupet në nevojë që jetojnë në Shkodër, përfshirë anëtarët e minoritetit Rom dhe Egjiptian për të pasur akses në një gamë të gjerë të shërbimeve sociale të integruara me bazë në komunitet si: këshillim psikologjik, ndihmë mjekësore, këshillim ligjor, ndërmjetësim punësimi.
Shërbimet do të ofrohen nga një personel i përkushtuar i mbështetur nga Bashkia Shkodër.
Rreth 500 romë dhe 1100 egjiptianë që jetojnë në Bashkinë e Shkodrës përballen me një sërë sfidash lidhur me strehimin, aksesin në shërbime sociale dhe arsimin.
Përmes projektit ‘Fuqizim Ekonomik dhe Social për Romët dhe Egjiptianët - shtysë për përfshirjen sociale’ (FESRE) i financuar nga Bashkimi Evropian dhe zbatuar nga PNUD në bashkëpunim me Ministrinë e Shëndetësisë dhe Mbrojtjes Sociale, po ofrohet një model i ri për menaxhimin e rasteve dhe adresimin e sfidave të shumta me të cilat përballen minoritetet Rome dhe Egjiptiane me qëllim integrimin e tyre të mëtejshëm në shoqëri.
© SYRI.net