Kryetari i PD, Sali Berisha, deklaroi sot para gazetarëve se kjo do jetë vjeshta e grevave dhe protestave.

“Sali Berisha dhe PD do bëjë gjithçka që kjo vjeshtë të jetë vjeshtë grevash, protestash, revoltash paqësore, mosbindje civile. Ky është kushti më themelor për të kthyer vendin në normalitet. PD është e gatshme. Pakënaqësia dhe revolta është shumë e lartë. Pritshmëria e tyre është shumë e madhe,” tha Berisha.

“Nuk do përsëritet opozita e Bashës. Nuk jemi në atë fazë. Duhet të bëjmë shumë punë për grevat, protestat, mosbindjen civile. Natyrisht duhet organizim. Do të fillojmë betejën me Edi Ramën dhe Edi Rama e ndjen këtë,” tha ai.

Berisha thotë se mes tij dhe kreut të Partisë së Lirisë, Ilri Meta nuk ka rivalitet për drejtimin e opozitës.

Në një deklaratë për mediat nga selia blu, Berisha u shpreh se me Partinë e Lirisë do të koordinohet për aksionin opozitar.

“Nuk rezulton asnjë lloj rivaliteti. Takime bëhen, janë publike dhe jopublike. Jam i bindur që me Partinë e Lirisë do ketë marrëdhënie shumë të mira dhe bashkërendim shumë të mirë. Sezoni që vjen, jemi në të njëjtën valë, do ndërmarrim të gjitha hapat e nevojshëm për suksesin e protestave tona”, theksoi kryedemokrati.

Berisha tha gjithashtu se në PD po punohet për të përgatitur infrastrukturën ligjore për primaret.