Ish-ministri Saimir Tahiri ka dalë në një konferencë për media nga selia e Kuvendit, për të mbrojtur sërish veten.

Pjesë nga deklarata:

Nuk është rastësi që paralelisht që po më bëhet gjyqi juridik, vazhdon dhe ai politik nga ata që nuk kanë lënë gjë pa vjedhur nga xhepat e qytetarëve, që nuk kanë as kursye as familjarët, por unë u them se do ta përballoj dhe këtë.

Me këtë politikë të pistë, u them “rrini pa merak” se unë do ta përballoj këtë sido të jetë.

Nëse ka një dritare sado të vogël që të dalë e vërteta për njerëzit unë do të jem aty dhe jo me fjalë, as me thashetheme por me prova. Për mua nuk ka rëndësi debati politik, por e drejta e shenjtë.

Për çmimin e së vërtetës unë jam i gati të paguaj me gjithçka kam dhe do ta gjej vetë pa ndihmë dhe mbështetje të cilido lloji.

Unë tani jam një qytetar pa asnjë lloj pushteti.

Siç e shihni, unë sigurova këtë dokument (e shfaq para medias) nga Prokuroria e Katanias. Mban datën 23 e thotë se sa për shtetasin Saimir Bashkim Tahiri nuk rezulton të ketë pasur ndonjëherë ndonjë procedim penal

Pra, Prokuroria e Katanias që ka hetuar 4 vjet grupin kriminal ku “bëja pjesë dhe unë”, nuk ka gjetur asgjë për të nisur procedimin penal ndaj meje e thotë se nuk është hetuar kurrë ndaj meje deri më sot. Po si është e mundur që Prokuroria jonë kërkon arrestimin tim?!

A nuk thanë prokurorët tanë se prisnin letra nga Italia? Edhe unë po pres.

Kaq të vështirë e kishin ata të merrnin këtë përgjigje që e mora unë për 48 orë?! Kuptohet në ato përgjime se ka një Saimir që ka kamiona dhe merret me trafik droge po jo se unë mund të isha njëhërësh edhe bosi edhe shoferi edhe hamalli i bandës!

Si ka mundësi që Prokuroria që e pranoi publikisht, nuk e dinte fare se unë kisha kërkuar hetim për Habilajt, për  makinën dhe gjithçka u tha atëherë për përfshirjen në trafik droge? Si ka mundësi që nuk e dinte që ka hetuar 1 vit e nuk ka kthyer përgjigje?

Ajo racë politike ku Luli dhe Monika janë të parët, ku hyjnë pallavrat e çdo lloji të politikës dhe parashikimet se do bjerë tërmet dhe hyjnë përbetimet se në Shqipëri do të ndodhë hataja dhe  NATO do të vijë këtu nga lloj lloj analistësh duke bërë llum Shqipërinë, si nuk e mori kush mundimin të bëjë një verifikim minimal si ky që bëra unë, por shfreu fantazinë?

Nuk më intereson se kush shkel ligjin dhe arrestohet po unë luftuar që kjo të ndodhë vazhdimisht. Ju siguroj se cilado bandë kriminale qoftë edhe kjo që po flasim më ngjan tërësisht amatore në krahasim me bandën që ka gatuar  gjithë këtë histori duke hedhur në redaksi lajmesh, gjithfarë “bombash”.

Unë i kuptoj qëllimet e gjithsecilit po nuk do të bëj asnjë ditë luftë politike me këtë çështje

Kam premtuar se nuk do të fshihem pas partisë dhe çdo lloj marrëdhënieje politike dhe kam kërkuar të bëj betejen  time për të vërtetën.

Unë do ta fitoj betejën  time ndaj llumit të rrugës dhe bandës në politike dhe i kam kërkuar avokatit tim të kërkojë të vërtetën. Nuk kam asnjë orë për të humbur deri sa të shkoj te e vërteta dhe e drejta dhe nuk pres të bëhet tërkuzë kjo histori për të bërë politikë ata që janë mësuar të bëjnë dhe do bëj çmos që kjo histori të mos ngelë në kanalet e ndryshkura të drejtësisë. Nuk do të humbas asnjë ditë kohë

Këtë dokumenta do t’ua vë në dispozicion se duhet të shohim disa të vërteta të thjeshta para se të shikojmë të vërtetat e mëdha.

Nuk kam asnjë lloj imuniteti nëse duhet ta kuptoni

Jam i gatshëm të hetohem

Nëse ka deputetë në kuvend, përfshirë PS, që besojnë se duhet të arrestohem i ftoj ta bëjnë këtë.

Nuk dua mbrojtje nga askush; nuk dua të dal nga kjo histori si njeriu që hajt se po ia falim kësaj radhe. Dua t’i shkoj të vërtetës deri në fund dhe të përballem me të gjithë me kokën lart në rrugë dhe në politikë të dalë e vërteta dhe të përballem me çdo pasojë.

Deputetët e PS në Këshillin e Mandateve dhe në parlement jam i bindur se do të mbrojnë të vërtetën dhe jo Tahirin, nëse jo,  atëhërë le të votojnë që të shkoj në burg."