Dinamo ka dalë me një rezultat pozitiv nga transferta ndaj Aluminijt, duke barazuar 1-1 në ndeshjen e parë të turit të dytë kualifikues të Ligës së Konferencës. Ekipi i drejtuar nga Ilir Daja zhvilloi një paraqitje të mirë dhe ruan shanse të plota për kualifikim, që do të vendoset në takimin e kthimit në “Elbasan Arena”.

Blutë e nisën ndeshjen në mënyrën më të mirë të mundshme, duke kaluar në epërsi që në minutën e 15-të. Hekuran Berisha finalizoi me sukses një aksion të skuadrës shqiptare dhe i dha avantazhin Dinamos.

Më pas, kryeqytetasit krijuan edhe disa raste të tjera të rrezikshme për të thelluar diferencën. Momenti më spektakolar erdhi nga Eridon Qardaku, i cili ishte shumë pranë një eurogoli me goditje dënimi, por tentativa e tij u ndal nga shtylla.

Kur dukej se Dinamo po shkonte drejt një fitoreje të rëndësishme, Aluminij gjeti golin e barazimit në minutën e 83-të. Pas një situate të paqartë në zonën e skuadrës shqiptare, Vrbanec përfitoi dhe dërgoi topin në rrjetë për rezultatin përfundimtar 1-1.

Gjithsesi, barazimi në transfertë mbetet një rezultat i favorshëm për Dinamon, e cila do të kërkojë të sigurojë kualifikimin përpara tifozëve të saj në ndeshjen e kthimit, që do të zhvillohet pas një jave në “Elbasan Arena”.