Dhjetëra banorë të krahinës së Lumit të Vlorës janë ngritur në protestë këtë të shtunë. Nën moton “Larg duart nga Shushica”, ata kundërshtojnë projektin e ujësjellësit që do të marrë ujin nga burimi i lumit Shushica për të furnizuar banorët e bashkisë së Himarës, duke bërë thirrje për anulimin e tij.

Paraditen e kësaj të shtune, dhjetëra banorë të krahinës së Lumit të Vlorës janë ngritur në protestë, për të disatën herë radhazi. Me thirrje të shumta e pankarta në duar me sloganin “Larg duart nga Shushica”, ata kundërshtojnë projektin e ujësjellësit që do të marrë ujin nga burimi i lumit Shushica për të furnizuar banorët e bashkisë së Himarës.

Sipas tyre ky lumë është i vetmi burim jetese për këto zona, që e përdorin edhe për aktivitetet ekonomike, por mbi të gjitha është edhe një atraksion turistik.  Protestuesit i bëjnë thirrje kryeministrit që ta ndalë këtë investim prej 9.5 milion eurosh, që do të dëmtonte të gjithë zonën.

Nga ura e Laskos në Kuç ku protestuan banorët e 37 fshatrave ku kalon ky lumë, ata bënë me dije se nuk do të ndalen deri në anulimin e projektit.