Kryetari i grupit parlamentar të PS-së, Taulant Balla dhe ministri Blendi Gonxhe kanë akuzuar Rusinë se po sponsorizon protestat në Tiranë.

Për këtë arsye, ambasada ruse në Tiranë ka reaguar duke iu përgjigjur Ballës dhe Gonxhes.

Deklarata e plotë e ambasadës ruse:

Deklaratat e Ministrit të Turizmit, Kulturës dhe Sportit të Shqipërisë B. Gonxhja dhe deputetit të Parlamentit të Shqipërisë, Kryetarit të Grupit Parlamentar të Partisë Socialiste të Shqipërisë T. Balla në lidhje me ‘përfshirjen e Kremlinit’ në protestat, që po zhvillohen në vend, ngjallin habi.

Pretendime të ngjashme po shohim edhe në një numër mediash nga gazetarë të caktuar. Këto deklarata janë krejtësisht të pabaza.

Rusia zbaton me rreptësi njërin prej parimeve themelore të politikës së saj të jashtme: parimin e mosndërhyrjes në punët e brendshme të shteteve të huaja.

Moska gjithmonë respekton zgjedhjen e popullit dhe punon me qeverinë e zgjedhur në mënyrë legjitime. Ne i urojmë sukses dhe begati popullit shqiptar, pavarësisht koniunkturës së krijuar politike dhe nivelit aktual të marrëdhënieve.

Me keqardhje vërejmë se kjo nuk është hera e parë që politikanët shqiptarë janë përpjekur t’i imponojnë publikut vendas në mënyrë të pabazë idenë e të ashtuquajturit ‘ndikim dashakeq’ të Rusisë.

Ne bëjmë thirrje për një qasje më të përgjegjshme ndaj deklaratave të tilla dhe një përmbajtje nga kërkimi i armiqve aty, ku nuk ekzistojnë.