Analisti Çim Peka komentoi për gazetaren Juli Krisafi në SYRI TV marrjen në pyetje në Hagë të presidentit kosovar, Hashim Thaçi.

Peka tha se ishte një portret i zymtë i presidentit Thaçi kur doli pas marrjes në pyetje.

Duke komentuar deklaratën e Thaçit “nesër do të shkoj, por nuk e di kur do të kthehem’, Peka tha se ‘nga kjo, nuk përjashtohet asnjë variant, as mundësia e pranimit të aktakuzës nga Gjykata Speciale;.

“Një pranim i saj do çonte automatikisht në ndalimin e presidentit. Presidenti po intervistohej nga paragjyqtari. Tani është Gjykata Speciale që po vendos për fatin e Hashim Thaçit. Shenjat janë që mund ta pranojë aktakuzën,” tha Peka.

Edhe Peka tha se në Hagë shkoi presidenti Thaçi dhe jo qytetari Thaçi. Ai solli në vëmendjen shembullin e Ramush Haradinajt që u dorëhoq nga posti i kryeministrit para se të shkonte në Hagë.

“Haradinaj dha dorëheqjen duke deklaruar se nuk mund të dërgoj kryeministrin e Kosovës në Gjykatën Speciale. Nuk e çova herën e parë, nuk do e çoj as herën e dytë. Sot nuk shkoi në Hagë qytetari Thaçi, por shkoi presidenti Thaçi,” tha Peka.

Sipas tij, me vizitat e fundit nëpër varre dëshmorësh, “Thaçi po mundohet që ta unifikojë akuzën ndaj tij si akuzë ndaj UÇK-së”, në kohën kur Haga dhe aktorët e tjerë të huaj dhe vendas po thonë se kjo është aktakuzë personale dhe jo ndaj UÇK-së.