Nga Petrit Vasili.

Muaj me parë kam thënë që Reforma në Drejtësi ka vdekur. Reforma në Drejtësi si filozofi dhe si veprim konkret, ka vdekur, pasi kapja e drejtësisë nga Rilindja fitoi mbi drejtësinë e paanshme dhe të barabartë për të gjithë.

Reformën e vdekur, tashme Rilindja po e klonon pa u lodhur duke filluar që nga zgjedhja e Prokurores së Përgjithshme, që u zgjodh kundër Kushtetutës me 69 vota, kur Komisioni i Venecias kishte sugjeruar që të mos përdoreshin as 84 votat, që mazhoranca kishte në atë kohë si dhe pa "Vetting";

që nga asgjesimi i Gjykatës Kushtetuese dhe asaj të Lartë për të legjitimuar pandëshkueshmërinë e qeverisë dhe për bllokuar mundësinë e ankimit për koncesionet, grabitjen e pronës publike etj; që nga bllokimi i qëllimshëm i ngritjes së KLGJ dhe KLP dhe Inspektorit të Lartë të Drejtësisë;

që nga bllokimi i KED me sebepin e "Vetting"-ut, ndërkohë që kryeprokurorja e përkohshme u zgjodh pa "Vetting" dhe bëri ç'deshi për muaj të tërë, duke mbyllur gojën edhe për ekspertizën e audio-përgjimit të Agron Xhafajt, që demek e kishte bërë Kryeministri duke shpërdoruar detyrën e duke kryer një vepër të rëndë penale të fshehjes së fakteve;

që nga transformimi i Komisionit të Ligjeve në Inkuizitor injorant, që po djeg Reformën me votimet idiote të tij.

Ku është Grupi i Ekspertëve të Nivelit të Lartë, që iu dha e drejta të propozonte projektligjet e Reformës? Komisioni i Ligjeve i merr propozimet e ekspertëve dhe i klonon paturpësisht duke i ndryshuar totalisht ato, vetëm me votat e Rilindjes!

Edhe projektligjin për Magjistraturën, Komisioni i Ligjeve e klonoi dhe votoi hajdutërisht vetëm me votat e Rilindjes, duke hequr afatet e ligjit me gjithë insistimin e fortë parimor të opozitës.

Rilindja, me britma histerike thoshte se "Reformën po e bëjnë ekspertët dhe ne nuk ndërhyjmë!", ndërsa sot draftet e ekspertëve të nivelit të lartë janë zëvendësuar nga klonimet e sharlatanëve të Komisionit të Ligjeve. Ndaj reforma ka vdekur!

Fryma dhe filozofia e 21 - 22 korrikut dhe e votimit të Shtatë Ligjeve, është shuar së bashku me ndërkombetarët, ambasadorë a misione qofshin, që i dolën asaj për Zot. Sot ka vetëm arna dhe klonime, që po riciklojnë fatalisht drejtësinë e vjetër.

Garancitë e ndërkombëtarëve për zbatimin korrekt të Reformës, janë tashmë thjesht një përrallë nga e kaluara. Motua e Rilindjes është: "Poshtë Reforma në Drejtësi dhe rroftë kapja!"