Kryeministri hungarez Victor Orban ka denoncuar gjendjen e Bashkimit Europian, duke thënë se është thuajse i panjohur nga blloku të cilit Budapesti iu bashkua 20 vjet më parë.

Orban ishte një përkrahës i fortë i lëvizjes në vitin 2003, kur hungarezët votuan me shumicë dërrmuese që vendi i tyre të bëhej anëtar i BE-së. Anëtarësimi i vendit u finalizua më 1 maj të një viti më pas.

Megjithatë, politikat e bllokut kanë ndryshuar ndjeshëm që atëherë, vuri në dukje lideri hungarez gjatë daljes së tij të rregullt të së premtes në Kossuth Radio. Ai ende beson se të qenit pjesë e unionit është në interes kombëtar, por renditi disa pika për të cilat nuk është dakord me Brukselin.

Kur Budapesti u bashkua me bllokun, nuk priste që të detyrohej të pranonte emigrantë nga pjesë të tjera të botës ose të bëhej presion për mbrojtjen kushtetuese të familjes, e karakterizuar si e bazuar në një martesë mes një burri e një gruaje, tha Orban.

Pranimi në BE "nuk kishte të bënte me manovrimin e liderëve europianë në një luftë në vend të paqes", shtoi ai, duke iu referuar armatimit të Ukrainës kundër Rusisë.

Kryeministri u kërkoi qytetarëve të BE-së të votojnë në zgjedhjet e ardhshme të Parlamentit Europian për partitë që mbështesin një zgjidhje paqësore të konfliktit të Ukrainës, duke përfshirë Partinë Fidesz të udhëhequr nga Orban në Hungari.

Nëse një numër i konsiderueshëm kandidatësh pro paqes bëhen deputetë, "mund të kemi një Parlament Europian që nuk i shtyn liderët europianë drejt luftës, por e tërheq Europën nga skaji i humnerës," tha ai.

Në fillim të kësaj jave, Ministri i Jashtëm hungarez Peter Szijjarto tha se Budapesti do të kundërshtonte një plan të propozuar nga Sekretari i Përgjithshëm i NATO-s, Jens Stoltenberg për të krijuar një skemë ndihme pesëvjeçare prej 100 miliardë eurosh (107 miliardë dollarë) për Kievin.

Hungaria ka qenë anëtare e bllokut ushtarak të udhëhequr nga SHBA që nga viti 1999. Në mars, ambasadori amerikan në Hungari David Pressman akuzoi qeverinë e Orbanit për dëmtimin e angazhimit të NATO-s ndaj Kievit dhe për "qëndrimin me Rusinë"./Telex