Presidenti kinez Xi Jinping fillon vizitën e tij zyrtare shtetërore në Francë, ndërkohë që tensionet mbi automjetet elektrike dhe subvencionet shtetërore po ziejnë.

Presidenti Xi Jinping po takohet me homologun e tij francez Emmanuel Macron në një vizitë të rrallë në Paris, si pjesë e një udhëtimi evropian që do të përfshijë  Serbinë dhe Hungarinë për bisedime të mëtejshme.

Me Macron dhe Jinping është edhe kryetarja e Komisionit Evropian Ursula von der Leyen, e cila po diskuton shqetësime më të gjera për BE-në.

Të dy udhëheqësit perëndimorë janë gati të bëjnë paralajmërime të rrepta në lidhje me tregtinë.

Vizita shtetërore vjen në një sfond tensionesh të ndezura mbi subvencionet shtetërore për produktet kineze në BE, gjë që e provokoi Komisionin Evropian të nisë një hetim vitin e kaluar.

Këto subvencione, argumentojnë disa liderë, u lejojnë prodhuesve kinezë të mbajnë kostot e tyre të ulëta, që do të thotë se ata mund të ofrojnë çmime më të lira për konsumatorët, ndërkohë që shtrydhin konkurrentët evropianë nga tregu.

Përpara udhëtimit të tij, Presidenti kinez Xi megjithatë u përpoq ta minimizonte mosmarrëveshjen.

Lidhjet midis Kinës dhe Francës janë "një model për bashkësinë ndërkombëtare të bashkëjetesës paqësore dhe bashkëpunimit të favorshëm midis vendeve me sisteme të ndryshme shoqërore", tha ai.

Një ton i ngjashëm çtensionimi u vërejt edhe te media shtetërore kineze.

"Bashkëpunimi ekonomik dhe tregtar Kinë - BE është i madh dhe goditjet dhe gërvishjet janë të pashmangshme," shkroi People's Daily, gazeta kryesore e Partisë Komuniste.

Po ashtu "Kina është e gatshme të forcojë komunikimin dhe koordinimin me BE-në, të promovojë bashkëpunimin dhe të zgjidhë dallimet përmes dialogut."