Pedri po përjeton momente të veçanta pas triumfit me Spanjën në Kupën e Botës. Mesfushori i Barcelonës është pritur me entuziazëm të jashtëzakonshëm gjatë vizitës së tij në Kinë, ku ndodhet si ambasador i markës së njohur sportive Adidas.

Futbollisti spanjoll ka zgjedhur të mos ndahet nga fanella e kombëtares spanjolle, me të cilën shfaq me krenari dy yjet mbi stemë pas suksesit historik në Botëror. Pedri ka marrë vëmendje të madhe nga tifozët kinezë, të cilët e kanë pritur si një prej figurave më të rëndësishme të futbollit botëror.

Vizita e tij në Azi vjen përpara rikthimit në stërvitje me Barcelonën për sezonin e ri. Pedri, i cili së fundmi ka nënshkruar një kontratë të rëndësishme me Adidas, është bërë një prej fytyrave kryesore të kompanisë gjermane, në të njëjtin nivel me yje të tjerë të futbollit si shoku i tij i kombëtares dhe klubit, Lamine Yamal, si dhe Jude Bellingham.

Gjatë turneut të tij në Kinë, Pedri do të vizitojë disa nga qytetet më të mëdha të vendit, përfshirë Pekinin, Suzhoun dhe Shangain. Ndalesa e parë e tij ishte në dy prej monumenteve më të famshme të kulturës kineze: Murin e Madh të Kinës dhe Tempullin e Qiellit.

Mesfushori 23-vjeçar po shijon një periudhë të artë në karrierën e tij. Pas rolit të rëndësishëm në triumfin e Spanjës në Botëror, ai është shndërruar në një nga simbolet e brezit të ri të futbollit spanjoll dhe një prej lojtarëve më të vlerësuar në arenën ndërkombëtare.