Ballkani është mposhtur 2-1 në transfertë nga Bohemians, në takimin e parë të raundit të dytë kualifikues të Ligës së Konferencës, por skuadra nga Suhareka mbetet plotësisht në garë për kualifikimin, që do të vendoset në sfidën e kthimit në Prishtinë.

Kampionët e Kosovës zhvilluan një pjesë të parë të mirë dhe arritën të kalonin në avantazh në minutën e 29-të. Toni Domgjoni u tregua i saktë nga pika e bardhë e penalltisë, duke i dhënë epërsinë Ballkanit pas një fillimi të kujdesshëm të ndeshjes.

Në pjesën e dytë, vendasit morën kontrollin e lojës, ndërsa Ballkani u tërhoq në mbrojtje për të ruajtur rezultatin. Presioni i irlandezëve u shtua minutë pas minute dhe solli edhe ndryshimin e fatit të takimit.

Barazimi erdhi në minutën e 76-të, kur James-Taylor, i futur nga stoli, shfrytëzoi asistimin e Devoy dhe mposhti portierin kosovar.

Kur dukej se sfida po shkonte drejt barazimit, Bohemians goditi edhe një herë në minutën e 90-të. Këtë herë James-Taylor u kthye në rolin e asistuesit, ndërsa Tierney përfitoi nga një situatë e rrëmujshme në zonë për të shënuar golin e fitores 2-1.

Megjithatë, gjithçka mbetet e hapur për ndeshjen e kthimit. Ballkani do të ketë mundësinë të përmbysë disavantazhin para tifozëve të tij në Prishtinë dhe të sigurojë një vend në raundin e tretë kualifikues të Ligës së Konferencës.