Brenda Real Madridit po shtohen zërat kritikë ndaj Kylian Mbappé, jo për aftësitë e tij në fushë, por për mungesën e lidershipit që pritej prej tij.

Sulmuesi francez mbetet një nga lojtarët më vendimtarë të skuadrës në aspektin statistikor, por kjo nuk duket se mjafton për të përmbushur pritshmëritë e klubit madrilen.

Sipas raportimeve nga Spanja, brenda ambientit të “Los Blancos” ekziston bindja se Mbappé nuk ka arritur të marrë rolin e udhëheqësit, si në fushë ashtu edhe në dhomat e zhveshjes. Pritshmëritë ishin të larta që nga momenti i transferimit, me idenë se ai do të bëhej figura kryesore e projektit të ri.

Kritikat fokusohen sidomos te mungesa e ndikimit në momentet më të vështira të ndeshjeve, aty ku liderët e vërtetë bëjnë diferencën.

Në një sezon të komplikuar për Realin, i shoqëruar me rezultate zhgënjyese dhe eliminimin nga UEFA Champions League, presioni mbi yjet e skuadrës është rritur ndjeshëm.

Klubi tashmë po analizon jo vetëm performancën sportive, por edhe aspektin e karakterit dhe ndikimit në grup.

Në këtë drejtim, Mbappé shihej si një pikë referimi, por deri tani nuk ka përmbushur plotësisht këtë rol.

Mesazhi nga brenda klubit është i qartë: talenti i tij nuk vihet në diskutim, por për t’u bërë lider i Real Madrid kërkohet më shumë se gola – kërkohet personalitet dhe ndikim në çdo moment të lojës.