Portieri i Kepit të Gjelbër, Vozinha, po përjeton një moment të jashtëzakonshëm në Kupën e Botës 2026, duke u shndërruar në një nga historitë më të bujshme të turneut. Paraqitjet e tij me përfaqësuesen afrikane në fazën e grupeve kanë tërhequr vëmendje globale, duke e kthyer në një fenomen të rrjeteve sociale.

Veterani hyri në turne me pak më shumë se 50 mijë ndjekës në Instagram, por gjithçka ndryshoi pas ndeshjes së parë ndaj Spanjës, e cila përfundoi 0-0: brenda më pak se 90 minutash, numri i ndjekësve të tij u rrit në rreth 1 milion.

Rritja nuk është ndalur me kaq. Sot, Vozinha ka arritur shifrën e 15.5 milionë ndjekësve, duke kaluar edhe portierin gjerman Manuel Neuer dhe duke u ngjitur në mesin e portierëve më të ndjekur në botë.

Sipas renditjes aktuale, ai renditet pas vetëm tre emrave legjendarë: Thibaut Courtois me 17.9 milionë ndjekës, Keylor Navas me 19.1 milionë dhe Iker Casillas me 20.4 milionë.

Momente të veçanta jashtë fushës kanë ndihmuar gjithashtu në rritjen e tij të popullaritetit, përfshirë takimin me presidentin e FIFA-s, Gianni Infantino, dhe ribashkimin emocional me nënën e tij në stadium, një skenë që u bë virale në mbarë botën.

Vozinha tashmë po shihet jo vetëm si heroi i Kepit të Gjelbër në fushë, por edhe si një nga figurat më të papritura të këtij Botërori, ku sporti dhe fama digjitale po ndërthuren më shumë se kurrë.