Messi vendos edhe një rekord të padëshiruar në Botëror, ja për çfarë bëhet fjalë

Mbrëmja e Lionel Messi ndaj Austrisë nuk u karakterizua vetëm nga rekordet pozitive. Edhe pse kapiteni i Argjentinës shënoi dy gola dhe u bë golashënuesi më i mirë në historinë e Kupave të Botës, ai vendosi edhe një rekord që nuk do të dëshironte ta kishte.

Në fillim të ndeshjes, pas një penalltie të fituar nga Lautaro Martínez dhe të akorduar pas ndërhyrjes së VAR-it, Messi mori përsipër ekzekutimin nga pika e bardhë. Megjithatë, goditja e tij përfundoi ngushtë jashtë shtyllës së djathtë të portës së mbrojtur nga Alexander Schlager.

Ky gabim bëri që ylli argjentinas të hyjë në histori si futbollisti me më shumë penallti të humbura në Kupat e Botës. Penalltia e humbur ndaj Austrisë ishte e treta në karrierën e tij në këtë kompeticion.

Herën e parë Messi gaboi nga pika e bardhë në Botërorin e vitit 2018 kundër Islandës. Penalltia e dytë e humbur erdhi në Katar 2022 në ndeshjen ndaj Polonisë. Tani, në Botërorin 2026, erdhi edhe gabimi i tretë kundër Austrisë.

Megjithatë, sulmuesi argjentinas reagoi në mënyrën më të mirë të mundshme. Ai realizoi golin e avantazhit në minutën e 38-të dhe më pas vulosi fitoren 2-0 në kohën shtesë, duke arritur në kuotën e 18 golave në historinë e Botërorëve.

Kështu, edhe pse regjistroi një rekord negativ nga pika e bardhë, Messi e mbylli mbrëmjen si protagonist absolut, duke udhëhequr Argjentinën drejt kualifikimit në fazën me eliminim direkt dhe duke forcuar statusin e tij si një nga legjendat më të mëdha të futbollit botëror.