Tottenhami është gjobitur nga UEFA dhe i është dhënë një ndalim i pezulluar për shitjen e biletave për tifozët në ndeshjet jashtë fushe, pas përshëndetjeve naziste të bëra nga tre tifozë ndaj mbështetësve të Eintracht Frankfurt.

Ngjarja ndodhi më 28 janar gjatë ndeshjes së Ligës së Kampionëve në Deutsche Bank Park, të cilën Tottenhami e fitoi 2-0. UEFA arsyetoi ndëshkimin për shkak të ‘sjelljes raciste dhe/ose diskriminuese të tifozëve të klubit’, duke sqaruar se ndalimi do të jetë i pezulluar për një periudhë njëvjeçare.

Përveç ndalimit të pezulluar, Tottenhami është gjobitur edhe me 30 mijë euro. Klubi londinez, i cili në 2019 arriti deri në finalen e Ligës së Kampionëve, do të duhet të paguajë gjithashtu një gjobë shtesë prej 2.250 eurosh për hedhjen e objekteve nga tifozët e tij. Klubi reagoi menjëherë, duke përshkruar sjelljen e grupit të vogël të tifozëve si ‘absolutisht e neveritshme’ dhe konfirmoi se ka dhënë tashmë ndalime për individët e përfshirë.

‘Konfirmojmë se tre individët që bënë përshëndetje naziste ndaj tifozëve të Eintracht Frankfurtit janë identifikuar dhe kanë marrë ndalime të përhershme, sipas politikës së ndëshkimeve dhe ndalimeve të klubit’, njoftoi Tottenhami.

Klubi theksoi qëndrimin e tij: ‘Tottenhami është kundër çdo forme diskriminimi dhe ka marrë masën më të fortë të mundshme. Sjellja e neveritshme e një minorance të supozuar të tifozëve atë natë nuk pasqyron aspak vlerat e klubit dhe të mbështetësve të tij’.

Vlen të përmendet se javën e kaluar, edhe Real Madridi nisi një hetim pasi një tifoz dyshohet se bëri një përshëndetje naziste para ndeshjes së Ligës së Kampionëve kundër Benfica.