Gennaro Gattuso ka reaguar ashpër ndaj ngarkesës së ndeshjeve dhe mënyrës se si po përcaktohen kalendarët, sidomos për lojtarët që udhëtojnë drejt kontinentit amerikan për ndeshjet e kombëtareve. Trajneri italian, i njohur për karakterin e tij të drejtpërdrejtë, tha se situata po bëhet e padurueshme dhe se çdo koment kritik interpretohet si sulm.

“Kalendarët janë bërë të padrejtë. Nuk mund të thuhet më asgjë, sepse menjëherë të hidhen sipër. Në Amerikën e Jugut më kanë masakruar vetëm pse kam thënë atë që shihet qartë, që lojtarët udhëtojnë tri ditë dhe kthehen të rraskapitur”, u shpreh Gattuso.

Ai theksoi se klubet po vuajnë pasojat, ndërsa organet drejtuese nuk marrin parasysh lodhjen fizike dhe rreziqet e dëmtimeve për futbollistët që përballen me një ritëm të pamëshirshëm.

“Lojtarët janë njerëz, jo makina. Ne i paguajmë, ne i përgatisim dhe pastaj rrezikojmë t’i humbasim për shkak të një planifikimi të paarsyeshëm. Është e pamundur të punosh kështu”, vijoi ai.

Gattuso u shpreh se nuk ka ndërmend të ndalojë së foluri hapur, edhe nëse kjo sjell kritika.

“Unë nuk kam frikë t’i them gjërat siç janë. Nëse diçka është e padrejtë, unë do të flas. Disa e marrin për keq, por kjo është e vërteta.”

Deklaratat e tij kanë ndezur diskutime të reja mbi kalendarët e futbollit modern, një temë që po bëhet gjithnjë e më e nxehtë mes trajnerëve dhe klubeve të mëdha europiane.