Ministria e jashtme e Bullgarisë i ka cilësuar si fyese dhe të paprovokuara deklaratat e fundit të Kryeministrit Rama ndaj Sofjes zyrtare. Në deklaratë thuhet se Edi Ramës i mungon aftësia europiane e komunikimit dhe i bëhet e ditur se politikanët ikin kurse kombet mbeten.  Ndaj deklaratës së ministrisë së jashtme bullgare ka reaguar menjëherë kryeministri Rama i cili ka lënë të kuptohet se retorika e tij ndaj Bullgarisë do vijojë.

Tirana dhe Sofja zyrtare po përballen me tensione të forta diplomatike. Ministria e jashtme bullgare ka reaguar ndaj retorikës ofensive që kryeministri Edi Rama ka përdorur gjatë këtyre muajve kundër Bullgarisë. Në qëndrimin e ministrisë së Jashtme bullgare, deklaratat e Kryeministrit konsiderohen të papranueshme.

“Nuk është hera e parë që dëgjojmë kualifikime të paprovokuara të ashpra, fyese nga kryetari i nje qeverie. Sulmet me një gjuhë kaq të ulët nuk mund të justifikohen më me karakteristikat dhe mungesën e aftësive evropiane të komunikimit. Presim që kryeministri shqiptar t'i përshtatë mjetet e tij shprehëse në një gjuhë që i përshtatet një politikani të një vendi kandidat për anëtarësim në BE.”-shprehet Bullgaria.

Në një mesazh direkt drejtuar Kryeministrit Rama, theksohet se politikanët largohen por kombet mbeten.

“Në këtë nivel kemi treguar gjithmonë gjithë respektin që kërkon një pozicion të përgjegjshëm dhe nivel të marrëdhënieve ndërshtetërore. Ne kemi një të ardhme të përbashkët me Shqipërinë. Politikanët largohen. Kombet mbeten. Popujt tanë kanë një interes të përbashkët, i cili nuk duhet të cenohet nga një gjykim i gabuar i politikanit. Është e papranueshme që marrëdhëniet mes shteteve të bëhen peng i ekscentricitetit të kryeministrit aktual shqiptar.”-shprehet MEPJ e Bullgarisë.

Në deklaratë thuhet se Bullgaria ka qenë gjithmonë ndër ato shtete anëtare të Bashkimit Evropian që mbështesin përkatësinë evropiane të popullit shqiptar. Ndaj deklaratës së ministrisë së jashtme bullgare ka reaguar menjeherë kryeministri Rama i cili ka lënë të kuptohet se retorika e tij ndaj Bullgarisë do vijojë.

“Oh! Ministria e Jashtme e Bullgarisë ka një problem me mënyrën time të të folurit! Mjaft e drejtë. Edhe unë kam një problem me mënyrën se si Bullgaria dëshiron të zgjidhë çështjet biletarale duke përdorur procesin e zgjerimit si mjet për rrëmbimin e dy vendeve të NATO-s! Merreni me qetesi miq: Hiqni VETO-n ose më duroni mua!”-tha Rama.

Pas reagimit të kryeministrit shqiptar ka pasur një tjetër reagim nga Sofja. Këtë herë është zv.kryeministrja Bullgare, Korneliya Ninova e cila njëherazi është edhe kryetare e Partisë Socialiste në Bullgari. Ninova ka thënë se Bullgaria ka dinjitetin e saj të pacenueshëm nga të tjerët.

“Deklarata e kryeministrit të Shqipërisë Edi Rama se është një vend i turpshëm anëtar i NATO-s që mban peng dy vende të tjera anëtare të NATO-s - Shqipërinë dhe Maqedoninë e Veriut, dhe se 26 vendet e tjera evropiane janë në një impotencë të frikshme është fyese, e ashpër dhe e papranueshme për Bullgarinë dhe për shtetet anëtare të BE-së. Ne nuk jemi një turp. Bullgaria ka dinjitet, mbron interesat e saj kombëtare dhe mbështet vlerat evropiane.”

Analistët kanë evidentuar faktin se sulmet e Ramës ndaj Bullgarisë ishin shumë më të ashpra sesa deklaratat e vetë Shkupit zyrtar ndaj të cilit ishte vendosur vetoja.