Gjatë ditës së sotme, Zëri i Amerikës bëri me dije se Shqipëria humbi përfundimisht gjyqin me sipërmarrësin italian dhe se vendi ynë duhet të paguajë 110 mln euro, shuma më e lartë që vendi ynë ka humbur ndonjëherë në arbitrazh.

Pas deklaratave të presidentit Meta dhe Partisë Demokratike, duke kërkuar zbardhjen e përgjegjësve të këtij super skandali financiar, Rama ka reaguar duke mos mbajtur përgjegjësi, por duke thënë se procesi gjyqësor ndaj këtij “marifetçiu” vazhdon.

Reagimin e Presidentit Meta, Rama e konsideron “gëzim sharlatanesk” i një “mendjehumburi dhe i partisë që për pushtet po infekton përditë shqiptarët”.

Postimi i Ramës në Twitter:

Gëzimi i Ilir Metës dhe i Lulepartisë për vendimin e padrejtë të arbitrazhit në favor të një individi që kërkohet nga drejtësia shqiptare është sa i neveritshëm, aq dhe i parakohshëm! Shqipëria ka fituar tre nga katër gjyqet ndërkombëtare ndaj këtij marifetçiu dhe beteja vazhdon!

Gëzimi sharlatanesk i Presidentit mendjehumbur dhe i partisë që për pushtet po infekton përditë shqiptarët, do të zgjasë pak dhe ata do të humbasin, jo Shqipëria! E cila siç po fiton mbi Armikun e Padukshëm, do të fitojë edhe mbi Marifetçiun e Paskrupullt!