Të shtëna me armë në Shkodër/ Qëlloi në ajër pas sherrit, policia shpall në kërkim autorin

Të shtëna me armë zjarri janë raportuar mbrëmjen e së premtes në fshatin Barbullush, në Vau i Dejës. Policia ka nisur kontrolle intensive për identifikimin dhe kapjen e autorit.

Sipas të dhënave paraprake, ngjarja ka ndodhur rreth orës 22:15, pas një konflikti të çastit mes disa personave.

Pas njoftimit, shërbimet e Policisë kanë mbërritur menjëherë në vendngjarje dhe kanë nisur kontrolle në zonë për identifikimin dhe kapjen e personit të përfshirë.

Ndërkohë, grupi hetimor, nën drejtimin e Prokurorisë, po kryen veprimet procedurale për zbardhjen e plotë të rrethanave të ngjarjes, dokumentimin e saj dhe identifikimin e autorit.

Njoftimi:

Vau i Dejës / Informacion paraprak

Më datë 18.07.2026, rreth orës 22:15, në fshatin Barbullush, Vau i Dejës, dyshohet se, gjatë një konflikti të çastit mes disa shtetasve, njëri prej tyre, gjatë largimit nga vendi i ngjarjes, ka qëlluar me armë zjarri në ajër.

Menjëherë pas marrjes së njoftimit, shërbimet e Policisë kanë shkuar në vendngjarje dhe po vijojnë kontrollet intensive në zonë, me qëllim identifikimin dhe kapjen e autorit.

Grupi hetimor, nën drejtimin e Prokurorisë, po kryen veprimet procedurale për sqarimin e plotë të rrethanave të ngjarjes, dokumentimin ligjor të saj, si dhe identifikimin dhe kapjen e autorit.