Shtyhet për në datën 16 shtator seanca gjyqësore për Arbër Paplekajn, ish-efektivi i akuzuar për vrasjen e Pjerin Xhuvanit pas një përplasje militantësh në Elbasan, gjatë fushatës zgjedhore në 2021.

Seanca, e zhvilluar sot në Gjykatën e Elbasanit me dyer të mbyllura, u shty për shkak të mungesave të shumta dhe të avokatit Demir Çiftja.

Vrasja në Elbasan:

Në muajin korrik Prokuroria e Elbasanit përfundoi hetimet për ngjarjen e 21 prillit 2021 ku mbeti i vrarë Pjerin Xhuvani.

Mbi Arbër Paplekajn rëndon akuza e vrasjes, ndërsa Niko Palla, Albert Nushi dhe policët e repartit “Shqiponja” akuzohen për shpërdorim detyre.

Prokurorët e çështjes Ritvan Suka dhe Platin Alicka pushuan akuzat për armëmbajtje pa leje, tentativë vrasje të punonjësve të policisë, vjedhje me dhunë dhe heqje e paligjshme e lirisë për Arbër Paplekaj.

Për gjithë anëtarët e strukturës për mbrojtjen e votës, Arjan Hoxha, Erjon Demushi etj, është pushuar akuza e heqjes së paligjshme të lirisë.

Pjerin Xhuvani, 56 vjeç, mbeti i vrarë pas një përplasje me armë ku u përfshinë disa persona. Rreth një orë pas përplasjes me armë në polici u dorëzua Arbër Paplekaj, ish-oficer i Repartit të Neutralizimit të Elementëve të Armatosur (RENEA).