Finalja e madhe e Kupës së Botës 2026 mes Argjentinës dhe Spanjës ka nisur të përjetohet me tensione edhe jashtë fushës, pasi hyrja në stadium është kthyer në një sfidë të vërtetë për mijëra tifozë dhe punonjës të organizimit.

Sipas raportimeve nga stadiumi ku do të zhvillohet finalja, radhët për të hyrë në impiant janë jashtëzakonisht të gjata, me pritje që kanë kaluar 4 orë. Kontrollet e sigurisë po zgjasin shumë më tepër se zakonisht, ndërsa arsyeja kryesore lidhet me masat e shtuara për praninë e presidentit amerikan Donald Trump në ceremoninë e finales.

Situata ka prekur të gjithë personat që duhet të futen në stadium: tifozë, gazetarë, vullnetarë, pjesëtarë të stafit organizativ dhe madje edhe kërcimtarët që do të marrin pjesë në shfaqjen e pushimit mes dy pjesëve të ndeshjes.

Në turmën e madhe janë krijuar edhe momente tensioni. Janë raportuar thirrje, fishkëllima, debate dhe përplasje mes disa gazetarëve, ndërsa mijëra njerëz përpiqen të ecin përpara në radhët e gjata që nuk po lëvizin me ritmin e duhur.

Edhe pse finalja mes Argjentinës dhe Spanjës ende nuk ka nisur, kaosi ka pushtuar tashmë zonën përreth stadiumit.

Autoritetet po përpiqen të menaxhojnë situatën dhe të sigurojnë që të gjithë të pranishmit të hyjnë në kohë për një nga ndeshjet më të mëdha të historisë së futbollit.