Algjeria dhe Austria rikthehen përballë njëra-tjetrës 44 vite pas një episodi historik që futbollit i la një njollë të madhe. Të dyja kombëtaret do të përballen në Kansas City, në një ndeshje ku situata në grup lë hapur skenarë llogaritjesh dhe madje edhe një barazim mund t’u shërbejë të dyja palëve.

Në këtë moment, Austria renditet e dyta në grup falë golaverazhit më të mirë (0 kundrejt -2 të Algjerisë), por paradoksalisht “Dhelprat e Shkretëtirës” mund të ndihen më komode në aspektin e kualifikimit, pasi një barazim mund t’i çojë më tej në fazën me eliminim direkt. Skenarët e mundshëm i përballin më pas me Zvicrën, ndërsa Austria mund të përfundojë përballë Spanjës, një kundërshtar shumë më i fortë.

Kujtimi i hidhur i Botërorit 1982

Historia mes këtyre dy skuadrave është e lidhur ngushtë me një nga skandalet më të famshme të futbollit botëror. Në Botërorin e vitit 1982, në Spanjë, Algjeria u eliminua pas një “marrëveshjeje të heshtur” mes Gjermanisë Perëndimore dhe Austrisë.

Në atë kohë, grupi ishte i ngushtë dhe matematika e kualifikimit ishte e qartë: një fitore minimale 1-0 e Gjermanisë ndaj Austrisë i kualifikonte të dyja skuadrat. Dhe pikërisht kjo ndodhi. Gjermania shënoi shpejt dhe më pas ndeshja u shndërrua në një lojë të ngadaltë e pa ritëm, me pasime të pafundme, duke lënë jashtë Algjerinë pavarësisht fitores së saj ndaj Kilit.

Ky episod, i njohur si “Pakti i mossulmimit i Gijónit”, shkaktoi reagime të mëdha dhe detyroi FIFA-n që më pas të ndryshonte rregulloren, duke vendosur që ndeshjet e fundit të grupeve të luhen në të njëjtën kohë për të shmangur manipulime të tilla.

Frika e “biskotës”-s rikthehet

Edhe në Botërorin 2026, diskutimi për “biskotën” është rikthyer. Në grupe të tjera ekzistojnë skenarë ku disa skuadra mund të jenë të kënaqura edhe me barazim, duke krijuar dyshime për ndeshje më pak konkurruese.

Në një rast tjetër, edhe barazimi 0-0 mes Paraguait dhe Australisë ka ngritur pikëpyetje mbi intensitetin e lojës, megjithëse të dyja skuadrat u kënaqën me rezultatin.

Ndërkohë, Irani ka reaguar më herët me një mesazh simbolik në dhomat e zhveshjes, duke kërkuar që ekipet të respektojnë fair-play-in dhe të shmangin çdo lloj llogaritjeje që dëmton sportin.

Një histori që nuk shuhet

Përballja Algjeri–Austri nuk është thjesht një ndeshje e fazës së grupeve, por edhe një rikthim i një historie që ka ndikuar drejtpërdrejt në mënyrën se si FIFA organizon sot turneun.

44 vite më pas, “era e biskotës” ende nuk është zhdukur nga futbolli, dhe kjo sfidë në Kansas City pritet të shihet me vëmendje të veçantë nga e gjithë bota.