Botërori 2026 ka përfunduar para kohe për mbrojtësin suedez, Isak Hien, i cili pësoi një dëmtim serioz muskulor gjatë ndeshjes ndaj Japonisë, takimi i fundit i Suedisë në Grupin F.

Lajmi është konfirmuar zyrtarisht nga Federata Suedeze e Futbollit, e cila ka bërë të ditur se dëmtimi është më i rëndë nga sa ishte parashikuar fillimisht dhe e bën të pamundur vazhdimin e turneut për qendërmbrojtësin e Atalantës.

Sipas komunikatës zyrtare, Hien ka pësuar një dëmtim në kofshën e majtë. Edhe pse nuk janë bërë publike afatet e sakta të rikuperimit, lojtari do të largohet menjëherë nga grumbullimi i kombëtares dhe nuk mund të zëvendësohet nga një lojtar tjetër.

Stafi mjekësor i Suedisë ka nisur menjëherë kontaktet me kolegët e Atalantës për të koordinuar procesin e rikuperimit të tij. Megjithatë, pritet që mbrojtësi të humbasë të paktën pjesën e parë të përgatitjeve verore me klubin italian nën drejtimin e trajnerit të ri Maurizio Sarri.

Ky dëmtim përbën një goditje të madhe si për Suedinë në Botëror, ashtu edhe për Atalantën, që do të duhet të bëjë pa një nga mbrojtësit e saj kryesorë në nisjen e sezonit të ri.