Nëse Irani do të eliminohet nga Botërori pas fazës së parë, siç ka ndodhur në të gjitha pjesëmarrjet e mëparshme, në Teheran do të ketë shumë për të diskutuar për arsyet e këtij dështimi.

Në të vërtetë, mund të thuhet gjithçka, por jo që Taremi dhe shokët e tij kanë pasur kushte ideale për t’u përqendruar vetëm te futbolli. Konteksti politik i njohur ka krijuar një situatë të vështirë, që nga refuzimi i FIFA-s për të zhvendosur ndeshjet nga SHBA-ja në Meksikë, deri te problemet me vizat për stafin dhe federatën para fillimit të turneut, si dhe udhëtimet e shpejta të detyruara nga autoritetet.

Megjithatë, një nga arsyet e pakënaqësive nuk mund të lidhet me arbitrimin, të paktën jo në ndeshjen e fundit të grupit ndaj Egjiptit.

Goli i anuluar në minutën e 94-t për pozicion jashtë loje të Khalilzadeh, i cili do t’i siguronte Iranit vendin e dytë në grup dhe kualifikimin direkt, u anulua në mënyrë të saktë nga arbitri dhe VAR-i.

Rregulli bazë i “offside”: llogaritet edhe portieri

Reagimi i ashpër i lojtarëve iranianë, veçanërisht i kapitenit Taremi, pas ndeshjes u shoqërua me akuza të forta ndaj FIFA-s, ndërsa në rrjetet sociale u përhapën menjëherë teori konspirative.

Megjithatë, në këtë rast bëhet fjalë për një keqkuptim të rregullores. Sipas rregullave të futbollit, një lojtar konsiderohet në pozicion të rregullt vetëm nëse mes tij dhe portës ndodhen dy lojtarë kundërshtarë. Njëri prej tyre mund të jetë edhe portieri.

Në këtë rast, portieri i Egjiptit kishte dalë përpara në zhvillimin e një goditjeje nga këndi, prandaj linja e VAR-it u zhvendos përpara dhe u vendos mbi mbrojtësin më të afërt me portierin, i cili përfaqësonte “lojtarin e dytë më të prapavijës”.

Në këtë mënyrë, pozicioni jashtë loje ishte shumë i ngushtë, pothuajse milimetrik, gjë që shpjegon edhe kohën e gjatë të verifikimit nga VAR-i gjatë ndeshjes së Botërorit.

Pra, Irani mund të ndihet i pafat për mënyrën se si u zhvillua episodi, por nuk ka pasur asnjë gabim arbitral në vendim. Në një turne ku çdo detaj analizohet nga disa kënde dhe me tre arbitra në VAR, një gabim i tillë do të ishte pothuajse i pamundur.

Në fund, mbetet fakti që në momente të tensionuara lojtarët mund të mos e kuptojnë plotësisht situatën në fushë, por shumë më problematike është përhapja e shpejtë e keqinformimit në rrjetet sociale.