“ZRrE të pezullojë vendimin”, Bajrami: Prokuroria o sot o kurrë, po rrezikohen 140 mijë vende pune

Deputetja e LDK-së, Hykmete Bajrami ka thënë se nëse vendimi nuk pezullohet sot, ZRrE do të mbahet mend si “armiku më i madh i ekonomisë në vend”.

Sipas saj, janë në rrezik mbi 140 mijë vende pune dhe një valë e re inflacioni për çdo produkt. Ajo ngre shqetësime për mungesë të transparencës dhe përgatitjes, duke theksuar se bizneset e përjashtuara ende nuk kanë marrë faturat për muajin qershor.

Bajrami kërkon hetim nga Prokuroria dhe akuzon se përfitues të kësaj skeme janë kompani të lidhura me interesa private e politike, përfshirë EFT-në e Vuk Hamoviqit dhe operatorë të tjerë me nga “dy punëtorë”. Ajo thekson se importi i energjisë në qershor është rritur për 800% krahasuar me majin dhe kërkon përgjigje nga ZRrE për këtë rritje drastike.

Reagimi:

Zyra e Rregullatorit për Energji, nëse sot nuk e pezullon vendimin për përjashtimin e bizneseve nga shërbimi universal i furnizimit me energji, do të hyjë në histori si armiku më i madh i ekonomisë në vend.

Janë në rrezik mbi 140 mijë vende pune dhe valë e re inflacionit për secilin produkt.

E kemi thënë që në fillimi: nuk ka treg të lirë, bizneset nuk janë të përgatitura, as institucionet, andaj bizneset e përjashtuara nga tregu i rregulluar ende nuk i kanë faturat e muajit qershor.

Prokuroria nuk duhet të ketë pardon për bordin e ZRRE-së.

Nuk duhet të lejohet asnjëherë që njerëz që paguhen me para publike me punu për interesa private. 

Le të tregojë ZRRE-ja si institucion mbikëqyrës:

• Pse bizneset e përjashtuara nga tregu i rregulluar ende nuk i kanë faturat e muajit qershor?

• Pse importi i energjisë në qershor është rritur 800% krahasuar me muajin maj?

• Kush janë përfituesit e kësaj skeme?

Emrat tashmë dihen: EFT-ja e Vuk Hamoviqit, tregtarët tjerë me nga dy punëtorë, e tash e tutje në rrethin e përfituesëve pritet me hy edhe kompanitë e licensuara së voni nga ZRrE-ja që kanë lidhje të ngushta me politikën.

ZRrE po sakrifikon ekonominë, prodhimin vendor dhe 140 mijë vende pune për interesa mafioze.
Prokuroria, o sot, o kurrë! [⚖️]

© SYRI.net

Lexo edhe:

• Miratohen dy Propozim-Vendime për pezullimin e përkohshëm të akteve të Odës së Avokatëve të Kosovës
• Mitrovica nis instalimin e kamerave të sigurisë publike
• Incident i rëndë në Gjilan: Një person sulmohet në kokë me shufër hekuri