Mungesa e Phil Foden dhe Cole Palmer në listën e Anglisë për Kupën e Botës 2026 ka shkaktuar debat të madh në mediet britanike, ndërsa tashmë duket se janë zbuluar arsyet kryesore të këtij vendimi nga trajneri Thomas Tuchel.

Tekniku gjerman nuk preferoi të jepte shumë detaje gjatë prezantimit të listës prej 26 lojtarësh, por sipas raportimeve nga Anglia dhe Franca, problemi kryesor lidhet me lodhjen fizike dhe mendore të dy yjeve anglezë, si pasojë e kalendarit tepër të ngjeshur.

Shoqata e Futbollistëve Profesionistë në Angli (PFA) ka kritikuar ashpër numrin e madh të ndeshjeve gjatë viteve të fundit, duke theksuar se Foden dhe Palmer janë ndër lojtarët më të mbingarkuar.

Mesfushori i Manchester City ka qenë i angazhuar pa ndërprerje në dy sezonet e fundit, duke marrë pjesë në Euro 2024 me Anglinë, si dhe në Kupën e Botës për Klube me klubin e tij.

Situatë e ngjashme paraqitet edhe për Palmerin, i cili ka luajtur vazhdimisht me Chelsea dhe përfaqësuesen angleze në turnetë madhorë të fundit.

Ndërkohë, jashtë listës ka mbetur edhe Trent Alexander-Arnold. Sipas raportimeve, mungesa e mbrojtësit të Real Madrid lidhet me një dëmtim muskulor të pësuar në fund të vitit 2025, si dhe me mungesën e vazhdimësisë në formë gjatë muajve të fundit.

Për shkak të problemeve fizike dhe ritmit jo të qëndrueshëm, Tuchel ka preferuar alternativa të tjera për krahun e djathtë të mbrojtjes në listën përfundimtare të Anglisë për Botërorin që nis më 11 qershor.