Transferimi i Edon Zhegrovës tek Juventusi verën e kaluar u prit me entuziazëm të madh nga tifozët bardhezinj. Aftësitë teknike, shpejtësia dhe fantazia e sulmuesit kosovar krijuan bindjen se ai mund të bëhej një nga lojtarët më vendimtarë të skuadrës. Kujtohet ende paraqitja e tij në barazimin 1-1 mes Lille dhe Juventusit në nëntor 2024, kur vuri në vështirësi mbrojtjen italiane, veçanërisht Juan Cabal-in.

Megjithatë, sezoni i sapopërfunduar nuk shkoi sipas pritshmërive. Zhegrova regjistroi 27 paraqitje, por në shumicën e rasteve u aktivizua nga stoli dhe nuk arriti të realizonte asnjë gol. Dëmtimet dhe problemet fizike ndikuan ndjeshëm në formën e tij, ndërsa edhe në momentet kur pati mundësi të tregonte vlerat, mungoi konkretizimi.

Drejtori sportiv, Damien Comolli, foli hapur për situatën e lojtarit, duke zbuluar edhe një bisedë mes tyre pas një rasti të humbur ndaj Galatasaray-t. “Ai ishte shumë i zhgënjyer dhe më tha se një gol mund të kishte ndryshuar sezonin dhe karrierën e tij. I thashë se tani duhet të reagojë fort nga ana mendore”, deklaroi Comolli.

Pavarësisht sezonit të vështirë, Juventusi nuk ka ndërmend të heqë dorë nga lojtari kosovar. Ndryshe nga situata e Loïs Openda-s, drejtuesit bardhezinj vazhdojnë të besojnë te potenciali krijues i Zhegrovës. Klubi investoi 15 milionë euro për transferimin e tij dhe i ofroi kontratë deri në verën e vitit 2030, një sinjal i qartë se besimi ndaj tij mbetet ende i fortë.