Trajneri italian, Alessandro Nesta, është shumë pranë rikthimit në Serie B. Sipas raportimeve nga mediet italiane, Avellino po finalizon marrëveshjen me teknikun roman, i cili pritet të marrë drejtimin e skuadrës pas largimit të Davide Ballardinit.

Klubi bardhejeshil synon të ndërtojë një projekt ambicioz për t’u rikthyer në elitën e futbollit italian, një objektiv që mungon që prej vitit 1988. Negociatat mes palëve janë në fazën përfundimtare dhe në orët e ardhshme pritet të arrihet akordi definitiv.

Raportohet se marrëveshja do të jetë e vlefshme deri në vitin 2028, me një kontratë dyvjeçare. Firma dhe prezantimi zyrtar para medieve pritet të zhvillohen më 3 ose 4 qershor. Aktualisht, Nesta ndodhet jashtë Italisë për angazhime komerciale që lidhen me Botërorin, por rikthimi i tij në Itali pritet javën e ardhshme.

Ish-mbrojtësi legjendar i Milani pritet të marrë me vete edhe pjesën më të madhe të stafit të tij teknik, përfshirë zëvendëstrajnerin dhe dy analistë ndeshjesh.

Për Nestën do të ishte eksperienca e katërt në Serie B, pas aventurave të mëparshme me Perugian, Frosinonen dhe Reggianan. Ai vjen pas eksperiencës në Serie A me Monza gjatë sezonit 2024/25, që përfundoi me rënien nga kategoria.