Cesc Fàbregas ka folur përpara medieve nga stadiumi “Sinigaglia”, duke bërë një përmbledhje të sezonit historik të Comos, i cili përfundoi me një arritje të madhe: vendin e katërt dhe kualifikimin në UEFA Champions League.

Ish-mesfushori spanjoll ka kujtuar momentin vendimtar të sezonit, fitoren në Cremona, që i hapi rrugën klubit drejt Europës. Ai theksoi se suksesi është rezultat i një pune të gjatë dhe të vazhdueshme.

“Ka ndodhur gjithçka shumë shpejt. Pas golit të katërt pyeta për rezultatet e tjera dhe më thanë që ishim brenda. Më pas pritëm fundin e ndeshjes në ‘San Siro’. Pas kësaj ka shumë punë pas skenës. Lojtarët e meritojnë këtë sukses, kanë besuar deri në fund”, u shpreh Fàbregas.

Trajneri i Comos foli edhe për mesazhet e shumta që ka marrë pas këtij sezoni të jashtëzakonshëm, duke zbuluar emra të mëdhenj të futbollit botëror.

“Kam marrë shumë mesazhe, nga Antonio Conte te José Mourinho dhe Arsène Wenger. Kam pasur shumë njerëz që më kanë shkruar dhe i falënderoj të gjithë”, tha ai.

Fàbregas shtoi gjithashtu se personi i parë që kontaktoi pas suksesit ishte trajneri i Cagliari-t, duke e cilësuar si një mik të afërt dhe një person shumë të ndershëm.

Ky sezon mbetet historik për Comon, që nën drejtimin e Fàbregas ka arritur një nga sukseset më të mëdha në historinë e klubit.