Barcelona po vazhdon të shikojë për të ardhmen, pavarësisht se problemet ekonomike ende nuk janë zgjidhur plotësisht. Klubi katalanas ka kthyer vëmendjen nga tregu brazilian, ku një nga emrat më interesantë është ai i Gabriel Veneno-s, i cilësuar nga mediet spanjolle si “Neymari i ri”.

Sulmuesi anësor vetëm 16 vjeç aktivizohet te Atlético Mineiro dhe konsiderohet një nga talentet më premtues të brezit të tij. Sipas raportimeve, klubi brazilian kërkon rreth 20 milionë euro plus bonuse për kartonin e tij, një shifër e lartë duke marrë parasysh moshën dhe faktin se nuk ka debutuar ende me ekipin e parë.

Veneno është një anësor me shumë teknikë dhe cilësi, profil që i përshtatet stilit ofensiv të Barcelonës, por që gjithashtu ngre pyetje për të ardhmen e tij në një repart ku tashmë luan Lamine Yamal, një tjetër talent i madh i klubit.

Sipas rregullave aktuale, lojtari nuk do të mund të regjistrohet dhe të luajë në Europë deri në moshën 18-vjeçare, duke u bashkuar fillimisht me Barcelona B. Kjo situatë mund të krijojë periudha pritjeje për zhvillimin e tij, një faktor që klubi duhet ta marrë parasysh me kujdes.

Barcelona ka pasur më herët situata të ngjashme me vonesa në regjistrime lojtarësh, si në rastin e afrimeve të Dani Olmo-s dhe Pau Víctor, çka tregon se procedurat financiare dhe administrative mund të ndikojnë ndjeshëm në planifikimin e transferimeve.

Megjithatë, interesi për Gabriel Venenon tregon qartë se Barcelona po kërkon të ndërtojë projektin afatgjatë me talentë të rinj, edhe pse ende mbetet për t’u parë nëse do të investojë 20 milionë euro për një lojtar kaq të ri.