Liverpooli ka marrë një lajm të keq para përballjes së rëndësishme ndaj Manchester United në Premier League, pasi do të udhëtojë drejt “Old Trafford”-it pa asnjë sulmues të mirëfilltë në dispozicion.

Alexander Isak është përjashtuar nga kjo ndeshje për shkak të një problemi në ijë, të pësuar gjatë stërvitjes këtë javë. Mungesa e tij përbën një goditje serioze për trajnerin Arne Slot, në prag të një dueli vendimtar për objektivat sezonalë.

Sulmuesi 26-vjeçar, i transferuar verën e kaluar nga Newcastle United për një shumë rekord në Britani prej 130 milionë paundësh, pritet t’u nënshtrohet ekzaminimeve për të përcaktuar shkallën e dëmtimit.

Sezoni i parë i Isak-ut me Liverpoolin ka qenë i vështirë, i shoqëruar me probleme të vazhdueshme fizike. Një frakturë në këmbë në muajin dhjetor e mbajti jashtë fushave për një periudhë të gjatë, ndërsa pas rikthimit ai ka arritur të luajë vetëm pesë ndeshje.

Në total, gjatë këtij sezoni në Premier League, Isak ka regjistruar vetëm 13 ndeshje si titullar dhe ka shënuar tre gola, duke mos arritur të ketë ndikimin e pritur.

Mungesa e tij vjen në një moment kyç për Liverpoolin, që do të përballet me një rival direkt si Manchester United, në një sfidë që pritet të ketë ndikim të madh në renditjen përfundimtare të kampionatit.