Një tjetër fundjavë e vështirë për Charles Leclerc në Çmimin e Madh të Spanjës, ku piloti i Ferrarit përfundoi sërish në mur gjatë sesionit të Q3, duke humbur mundësinë për të luftuar për ‘pole position’.

Pas incidentit, Leclerc nuk e fshehu zhgënjimin dhe reagoi me tone të forta, duke pranuar një nga momentet më të vështira të karrierës së tij.

“Si ndihem? Më vjen shumë turp. Jam këtu vetëm sepse duhet të flas, por më vjen turp,” deklaroi piloti monegask, i cili përsëriti gabimin pas aksidentit të mëparshëm në Montekarlo.

Ai theksoi se kishte besuar te potenciali i makinës gjatë gjithë fundjavës, por një tentativë e tepruar në kufijtë e performancës e nxori nga pista në momentin vendimtar.

“Kishim ritëm për ‘pole position’. Provova të bëja diçka më shumë dhe dola nga pista. Nuk ka justifikime. Më vjen shumë keq për tifozët,” shtoi Leclerc.

Pavarësisht zhgënjimit, piloti i Ferrarit u shpreh se mbetet optimist për garën, edhe pse pranoi se fundjava e tij nuk mund të konsiderohet pozitive.

“Është vetëm kualifikimi, jam i bindur për garën e nesërme. Por për ta larë këtë gabim, fitorja do të ishte minimumi që duhet të synoj,” tha ai, duke pranuar se ndjesia e përgjithshme e fundjavës mbetet negative.

Nga ana tjetër, drejtori i skuadrës Frédéric Vasseur e mbrojti pilotin e tij, duke theksuar se zhgënjimi është i natyrshëm pas një paraqitjeje të tillë.

“Leclerc kishte ritmin për ‘pole position’ dhe është normale të jetë i zhgënjyer. Ai po shtynte në limit,” u shpreh Vasseur.

Ai shtoi se edhe Lewis Hamilton po tregon progres të vazhdueshëm me makinën dhe se gara e së dielës do të jetë e ndërlikuar për të gjithë për shkak të temperaturave të larta dhe menaxhimit të gomave.

“Do të jetë shumë e vështirë, gjithçka do të varet nga gomat dhe temperatura që mund të arrijë deri në 50 gradë në asfalt,” përfundoi ai.

Një tjetër fundjavë me emocione të forta për Ferrarin, por me Leclerc që del nga kualifikimet me një ndjenjë të rëndë dhe shumë për të reflektuar përpara garës.