Mesfushori shqiptar i Zvicrës, Granit Xhaka, është shumë pranë një momenti historik në Kupën e Botës, teksa po i afrohet rekordit të paraqitjeve në Botëror me përfaqësuesen helvetike. Kontributi dhe ndikimi i tij janë vlerësuar maksimalisht si nga shokët e ekipit, ashtu edhe nga trajneri Murat Yakin.

Xhaka ka regjistruar deri tani 12 paraqitje në Botëror, të shpërndara në turnetë e viteve 2014, 2018 dhe 2022. Rekordin aktual e mban ish-shoku i tij te Bazeli, Xherdan Shaqiri, me 14 ndeshje, ndërsa në kuotën e 12 paraqitjeve është edhe Ricardo Rodríguez.

Shaqiri tashmë është tërhequr nga futbolli ndërkombëtar pas Euro 2024, çka e bën edhe më reale mundësinë që Xhaka të vendosë një rekord të ri, nëse qëndron i shëndetshëm dhe aktiv gjatë fazës së grupeve të Botërorit.

Në një material të publikuar nga FIFA, trajneri Murat Yakin nuk i ka kursyer fjalët e mira për kapitenin dhe liderin e mesfushës zvicerane.

“Mund të flasim me orë të tëra për rëndësinë e Granitit”, u shpreh Yakin, duke theksuar rolin e tij thelbësor në skuadër.

Trajneri zviceran vuri në dukje edhe mentalitetin e tij të jashtëzakonshëm, i cili reflektohet çdo ditë në stërvitje dhe ndeshje.

“Ai dëshiron të fitojë çdo ndeshje, çdo stërvitje. Ky është lloji i mentalitetit që e çon skuadrën përpara”, shtoi Yakin.

Edhe lojtarët e tjerë kanë folur për ndikimin e madh të Xhakës brenda grupit. Dan Ndoye theksoi se mesfushori është i drejtpërdrejtë dhe kërkon maksimumin nga të gjithë në stërvitje.

“Shpesh më thotë mendimin e tij gjatë stërvitjeve, qoftë pozitiv apo negativ. Ai përpiqet të nxjerrë performancën më të mirë nga çdo lojtar”, u shpreh Ndoye.

Ndërkohë, Nico Elvedi vlerësoi qetësinë që Xhaka i jep skuadrës në momentet e presionit, ndërsa Michel Aebischer e përshkroi si “një vëlla të madh brenda dhe jashtë fushës”.

Në moshën 33-vjeçare, Xhaka mbetet figura qendrore e Zvicrës, jo vetëm për përvojën, por për standardet që vendos dhe kërkesat e larta që i imponon grupit. Roli i tij si lider ka qenë konstant gjatë gjithë karrierës, ashtu si edhe përgjegjësia që ka mbajtur në klube si Arsenali dhe tani me përfaqësuesen.

Ndërsa rekordi i Botërorit është shumë pranë, gjithçka tregon se Xhaka nuk është thjesht një lojtar rekordesh, por zemra e një skuadre që synon një epokë të re suksesi.