Janë përmbyllur takimet e javës së 24-t të Kategoria e Parë, të zhvilluara më 28 shkurt dhe 1 mars, të gjitha në orën 13:30. Kjo javë konfirmoi edhe një herë forcën e skuadrave të kreut, me fitore të rëndësishme për Skënderbeun, Laçin, Pogradecin, Besën dhe Korabin.

Kryesuesi Skënderbeu Korçë vazhdon marshimin e sigurt drejt objektivit, duke fituar pastër 3-0 në transfertë ndaj AF Luftëtarit. Korçarët treguan superioritet dhe ruajnë vendin e parë me 57 pikë.

Në ndjekje të tyre qëndron Laçi, që shkatërroi Lushnjën 5-1 jashtë fushe. Bardhezinjtë regjistruan fitoren e dhjetë radhazi dhe mbajnë vendin e dytë me 54 pikë, duke ushtruar presion të vazhdueshëm mbi kreun.

Fitore me peshë arriti edhe Pogradeci, që triumfoi 2-1 në transfertë ndaj Apolonisë. Liqenorët renditen në vendin e tretë me 49 pikë dhe vazhdojnë të jenë në garë për objektivat madhorë.

Ndërkohë, Korabi Peshkopi mposhti minimalisht 1-0 Kastriotin, ndërsa Besa fitoi 1-0 në shtëpi ndaj Burrelit. Iliria dhe Kukësi u ndalën në barazim 1-1.

Java e 24-t konfirmon garën e fortë si për kreun, ashtu edhe për mbijetesën, me diferenca që po bëhen gjithnjë e më vendimtare në këtë fazë të sezonit.