Borussia e Dortmundit shmangu një humbje të papritur ndaj Heidenheimit, duke triumfuar 3-2 në një ndeshje dramatike të Bundesligës dhe duke ngushtuar diferencën me Bayernin e Mynihut në gjashtë pikë.

Vendasit patën vështirësi në 20 minutat e para, me Guirassy që provoi të gjuante, por u ndal nga portieri Ramaj. Heidenheimi u duk se mund të merrte avantazh, por një gol i anuluar nga Patrick Mainka dhe pritjet e portierit Kobel mbajtën Dortmund në lojë.

Avantazhi i parë erdhi falë Ëaldermar Anton, i cili shfrytëzoi një gabim të Ramajt dhe shënoi me një goditje të fuqishme, por para fundit të pjesës së parë Mathias Honsak barazoi rezultatin për mysafirët. Në fillim të pjesës së dytë, Julian Niehues kaloi Heidenheimin në avantazh, duke vënë në vështirësi Dortmundin.

Por BVB reagoi fuqishëm dhe falë penalltisë së dhënë pas një dueli të Niklas Dorsch, Guirassy barazoi rezultatin. Pak minuta më vonë, Maximilian Beier asistoi për Guirassy, i cili shënoi golin e fitores 3-2. Guirassy pati mundësinë të kompletonte ‘hat-trick’-un me një penallti tjetër në fund, por goditja e tij përfundoi mbi tra. Megjithatë, tre golat mjaftuan për Dortmund, që mbetet pa humbje në 12 ndeshjet e fundit dhe vazhdon ndjekjen e titullit. Heidenheimi, nga ana tjetër, mbetet ende pa fitore kundër ekipeve kryesore dhe pesë pikë larg sigurimit të mbijetesës.