Torino është rikthyer te fitorja në Serie A pas katër humbjeve radhazi, duke mposhtur Lecce-n me rezultatin minimal 1-0 në një ndeshje të luftuar, por jo shumë spektakolare. Goli vendimtar u shënua nga Che Adams në minutën e 29-të, pas një asisti perfekt nga Nikola Vlašić, me sulmuesin skocez që nuk gaboi përballë Falcone-s.

Paradoksalisht, goli erdhi në momentin më të mirë të miqve, të cilët pak minuta më parë kishin rrezikuar me një goditje nga distanca të Ramadanit, të ndalur me vështirësi nga Paleari. Torino kontrolloi më shumë lojën, por pa krijuar shumë raste të pastra, ndërsa Lecce u shfaq pak i rrezikshëm në fazën sulmuese.

Në pjesën e dytë, sërish Falcone u bë protagonist duke ndalur një goditje të Zapata-s pas një tjetër asisti të Vlašić. Che Adams pati mundësinë për dopietë, por këtë herë nuk gjeti portën. Lecce provoi të ndryshonte ritmin me zëvendësime, ndërsa te Torino u pa edhe debutimi pozitiv i Obrador-it, si dhe hyrja në lojë e Kulenović.

Në minutat e fundit, Banda iu afrua barazimit, por goditja e tij u ndal nga shtylla. Ndeshja u mbyll pa surpriza të tjera: Torino ngjitet në kuotën e 26 pikëve, ndërsa Lecce mbetet në 18, ende në zonë delikate të renditjes.