Kylian Mbappé po kalon një sezon shumë më të mirë me Real Madridin krahasuar me vitin e kaluar, duke shënuar deri tani 29 gola dhe duke forcuar pozicionin e tij në garën për Topin e Artë. Por pavarësisht shifrave të larta, duket se Francezi ka sjellë edhe probleme për ekipin.

Gazetari Devin Leveque, për RealChamps, thekson se rritja e formës së Mbappé-së nuk ka qenë pa kosto për ‘Los Blancos’. Sipas tij, sulmuesi kërkon të jetë protagonist në çdo aksion, duke u tërhequr shpesh pas dhe duke kërkuar topin, duke insistuar që veprimi të mbarojë me të. Kjo qasje, edhe pse mund të rrisë numrin e golave të tij, dëmton dinamikën kolektive të ekipit.

Leveque shpjegon se më e mira do të ishte që Mbappé të krijonte hapësirë për shokët e skuadrës dhe të tërhiqte mbrojtësit për të lënë të tjerët të shfaqen, por francezi rrallë e bën këtë. Si pasojë, edhe Vinicius Junior është ndikuar negativisht: rënia e formës së tij lidhet drejtpërdrejt me lëvizjet e Mbappé-së në krahun e tij.

Gazetari thekson gjithashtu se ky nuk është një problem i izoluar, pasi e njëjta dinamikë ndikon në të gjithë repartin ofensiv. Edhe me talentin, profesionalizmin dhe aftësitë teknike të Mbappé-së, ai ka regjistruar vetëm shtatë asiste në La Liga gjatë 18 muajve të fundit, një shifër që tregon se sistemi sulmues nuk funksionon si duhet.

Pra, transformimi i Mbappé-së në një golashënues të jashtëzakonshëm ka sjellë përfitime personale, por edhe një problem për ekipin, duke vënë në provë balancën kolektive që kërkon Xabi Alonso te Real Madridi.