Një ngjarje tronditëse ka goditur botën e sportit dhe veçanërisht komunitetin e triathlonit. Erica Fox, triatlete amerikane 55-vjeçare, e cila ishte shpallur e zhdukur prej 21 dhjetorit, është gjetur pa jetë në brigjet e Kalifornisë. Autoritetet konfirmuan se mbetjet e saj u zbuluan në një plazh në veriperëndim të Santa Cruz-it, duke forcuar dyshimet se ajo ka humbur jetën si pasojë e një sulmi nga peshkaqeni.

Sipas informacioneve zyrtare, Erica Fox po notonte në det të hapur pranë zonës së Monterey-t, si pjesë e një grupi me mbi dhjetë notarë që ishin nisur nga Lovers Point, një vend i njohur për aktivitete sportive ujore. Gjatë seancës së notit, gruaja u zhduk papritur, duke ngritur menjëherë alarmin mes pjesëmarrësve dhe autoriteteve lokale.

Një dëshmitar okular ka deklaruar se ka parë një peshkaqen me diçka që i ngjante një trupi njerëzor në gojë, dëshmi që tashmë përputhet me gjetjet e mëvonshme në bregdet. Kërkimet vazhduan për disa ditë, deri në zbulimin tragjik të mbetjeve mortore.

Ngjarja ka shkaktuar tronditje të madhe në SHBA dhe më gjerë, duke rihapur debatin për sigurinë gjatë notit në det të hapur, veçanërisht në zona ku prania e peshkaqenëve nuk është e pazakontë. Erica Fox ishte një sportiste e njohur në komunitetin lokal dhe vlerësohej për pasionin e saj për triathlonin dhe notin në ujëra të hapura.

Autoritetet po vijojnë hetimet për të sqaruar plotësisht rrethanat e ngjarjes, ndërsa familja dhe miqtë e saj kanë kërkuar respektimin e privatësisë në këtë moment të dhimbshëm.