Momente frike u përjetuan në kampionatin anglez të futbollit për femra (WSL), gjatë ndeshjes mes Tottenham-it dhe Liverpool-it, kur futbollistja 20-vjeçare, Mia Enderby, pësoi një dëmtim të rëndë në qafë. Pas një kërcimi për topin, Enderby ra keq në tokë dhe e gjithë pesha e trupit i ra mbi bazën e qafës, duke shkaktuar menjëherë panik në fushë.

Fillimisht loja vazhdoi, por kur u vu re se lojtarja nuk po ngrihej, u thirr ndërhyrja urgjente e stafit mjekësor. Ndeshja u pezullua për më shumë se 15 minuta, teksa Enderby u imobilizua dhe u transportua me barelë jashtë fushës, me maskë oksigjeni, drejt spitalit për ekzaminime të mëtejshme. Ajo ishte e vetëdijshme gjatë momentit të largimit, dhe sipas raportimeve të para, gjendja e saj duket stabile, edhe pse mbetet nën vëzhgim mjekësor.

Ndeshja e së dielës 2 nëntor përfundoi me humbjen e gjashtë radhazi për Liverpool-in, që mbetet në fund të klasifikimit pa pikë. Pas takimit, trajneri i Liverpool-it femra, Gareth Taylor, deklaroi se momenti ishte “shumë i vështirë për t’u parë”, duke shtuar se u veprua me kujdes maksimal për të shmangur çdo pasojë serioze.

Episode të tilla kujtojnë rëndësinë e ndërhyrjes së shpejtë dhe protokolleve mjekësore në sportin profesional, sidomos në dëmtime të zonës së qafës.