Tenisti spanjoll Rafael Nadal të premten iu nënshtrua një operacioni në muskulin e kofshës së majtë që prej disa kohësh i shkaktonte probleme serioze, pas së cilës në internet u përhap një foto nga shtrati i spitalit.

Për shkak të lëndimit të lartpërmendur, Nadal humbi Roland Garros, të preferuarin e tij Grand Slam, të cilin e fitoi 14 herë dhe ishte hera e parë në 19 vjet që nuk u paraqit në Paris. Ai luajti ndeshjen e fundit në raundin e dytë të Australian Open.

Më pas spanjolli u diagnostikua me një dëmtim në këmbën e majtë, gjë që e bëri të humbiste nëntë turne në kalendar: Doha, Dubai, Indian Wells, Miami, Monte Carlo, Godot, Madrid, Roma dhe tani Roland Garros, që në fund i kushtoi 2,370 pikë dhe zbritjen nga top 10-shja e tenistëve më të mirë në botë, për herë të parë që nga prilli 2005.

 “Për momentin nuk jam në gjendje të konkurroj, nuk është e mundur. Do të mundohem të rikuperohem në muajt në vijim, nuk do të caktoj datë se kur duhet të kthehem në fushë. Kur të jem gati fizikisht, do të nis nga fillimi. Mund të ndodhë që në fund për shembull, të luaj në Kupën Davis. Dhe të jem gati për fillimin e sezonit të ardhshëm. Mendoj se do të jetë viti im i fundit në karrierën time", tha tenisti spanjoll më herët.

Një nga tenistët më të mirë të të gjitha kohërave ka kryer operacionin në Barcelonë, ku fotografia është bërë në shtratin e spitalit dhe siç shkruajnë mediat vendase, konkretisht Relevo, rezultatet e operacionit do të publikohen sot, në ditën kur feston 37-vjetorin.

Ndonëse fansat e tij janë të shqetësuar për foton që qarkullon në internet, rrethana lehtësuese është se ai është i qeshur dhe me humor të mirë dhe siç ka thënë edhe më herët është i motivuar që të luftojë edhe një herë dëmtimet e tij dhe të rikthehet në fushë.