Kupa e Shqipërisë për vajza ngriti këtë fundjavë siparin e edicionit të 14-të me katër ndeshjet e para të fazës çerekfinale. Të shtunën u luajtën dy takimet e para, Kinostudio – Partizani dhe Teuta – Tirana, teksa ditën e sotme u zhvilluan edhe dy ndeshjet e tjera çerekfinale, Laçi – Apolonia e Kukësi – Vllaznia.
Të shtunën, Kinostudio mundi Partizanin në takimin e parë të kësaj faze, në një ndeshje spektakolare që përfundoi me rezultatin 4-3 të Kinostudios.
Takimi i dytë mes dy skuadrave do të zhvillohet javën e ardhshme, ku pritet të përcaktohet edhe gjysmëfinalisti i parë i këtij edicioni.
Sakaq, Tirana duket se ka siguruar një biletë për në gjysmëfinale pas fitores me shifrat e thella 9-2 kundër Teutës.
Vajzat bardheblu realizuan gjashtë gola që në pjesën e parë të takimit, ndërsa në fraksionin e dytë shënuan edhe tre gola të tjerë.
Në sfidat e ditës së sotme, Apolonia triumfoi me rezultatin 6-0 në transfertën e Laçit.
Dy skuadrat zhvilluan një ndeshje shumë të fortë, teksa pjesa e parë e lojës u përmbyll me shifrat 0-1, ndërsa në fraksionin e dytë, fieraket realizuan edhe pesë gola të tjerë.
Një rezultat me goleadë mori edhe Vllaznia, duke mundur Kukësin me shifrat 7-0.
Një takim që foli vetëm për shkodranet gjatë gjjthë 90 minutave.
Ndeshjet e kthimit do të luhen javën e ardhshme, nga ku do të përcaktohen edhe 16 ekipet gjysmëfinaliste të këtij edicioni.
Rezultatet e ndeshjeve të turit të parë eliminator:
Teuta 2-9 Tirana
Kinostudio 4-3 Partizani
Kukësi 0-7 Vllaznia
Laçi – Apolonia 0-6
Sipas skemës së re të përcaktuar nga Departamenti i Garave, në garë për të fituar Kupën e Shqipërisë për vajza janë 8 ekipe, ndërsa dy skuadrat e renditura në vendin e parafundit dhe të fundit, respektivisht Skënderbeu e Lushnja nuk do të marrin pjesë.
Kjo skemë është përllogaritur në bazë të renditjes së skuadrave pas përfundimit të fazës së parë.
© SYRI.net
Bëje LIKE dhe merr lajmin e fundit nga Sporti: