Futbollisti legjendar francez Zinedine Zidane ndodhet aktualisht në “udhëkryqin” e karrierës së tij, ku njëra rrugë e çon te Juventusi, dhe tjetra te kombëtarja franceze.

Pesëdhjetë vjeçari Zidane është një trajner i dëshmuar, por ai ka mbetur pa punë që kur u largua nga Reali në qershor 2021. Prej kohësh është përfolur se ai është në pritje të largimit të Didier Deschamps për t'u bërë trajner i kombëtares franceze dhe dyshohet se tashmë ka refuzuar ofertat e PSG-së dhe Manchester Unitedit që donin ta sillnin si trajner. Zizou e bëri këtë sepse donte të drejtonte Francën.

Corriere dello Sport shkruan se Zidane ende pret shansin e tij për të udhëhequr skuadrën në Kampionatin Evropian 2024 dhe Botërorin në 2026, por shumë varet nga vendimi i Federatës Franceze të Futbollit në lidhje me Deschamps.

Nëse Deschamps mbetet në pozicionin e trajnerit pavarësisht humbjes në finalen e Kupës së Botës në Katar kundër Argjentinës, Zidane mund të kthehet në Itali dhe të bëhet trajner i Juventusit. Drejtuesit e bardhezinjve do të zhvillojnë bisedime me trajnerin aktual Max Allegri në fund të sezonit për të zgjidhur të ardhmen e tij.

Megjithatë, edhe nëse Allegri largohet, pyetja është nëse Zidane do të vendosë ta zëvendësojë apo do të vazhdojë të presë me durim largimin e Deschamps.