Tre familje të vëllezërve Nikoçi edhe sonte do ta kalojnë natën në qiell të hapur për shkak se shtëpitë e tyre u dogjën plotësisht dje.

Për fat kanë shpëtuar njerëzit e shpisë ama trishtimi në sytë e pleqve, grave, burrave dhe fëmijëve ishte i tejskajshëm, pasi u është shkrumbuar gjithçka.

Të mbetur pa asgjë, rroba, mobilim, produktet e mbedhura për dimër që nga fasulet, patatet, gështenje deri te ilaçet dhe lodrat simbolike të fëmijëve ata apelojnë për ndihmë. 

Sot pranë familjes Nikoçi ka shkuar ish-deputetja dhe anëtarja e Këshillit Kombëtar të PD, Mimoza Hajdarmataj. 

Ajo bën thirrje për ndihmë nga shteti dhe donatorët. 

"Ndihmë nga shteti, i cili duhet të ishte aty të paktën me paketën e ndihmave në rast emergjencash të tilla. Ndihmë nga bashkia për të rindërtuar diçka nga ato rrënoja e jo të paraqitet si një ojf me ca kg ushqime e 2 batanie. Ndihmë nga të gjithë ne, në forma të ndryshme. Rilindja "nuk ka mundësi" tu vijë në ndihmë se nuk ju teprojnë lek nga fluturimet me çarter dhe nga llustrat e fasadave. Rasti është për solidaritet njerëzor. Çdo gjë për ta sot vlen", shkruan në Facebook, Hajdarmataj.