Studimi: Njerëzit që konsultohen shpesh me IA jashtë punës, më të prirur ndaj simptomave depresive!

Njerëzit që konsultohen shpesh me inteligjencën artificiale jashtë punës mund të jenë më të prirur ndaj simptomave depresive sesa të tjerët, sipas një ekipi studiuesish të udhëhequr nga mjekë në Spitalin e Përgjithshëm të Massachusetts dhe Shkollën Mjekësore Weill Cornell.

I publikuar nga Shoqata Mjekësore Amerikane, anketa dhe studimi dy-mujor i ekipit me pothuajse 21,000 të rritur me bazë në SHBA, sugjeron se ata që angazhohen me platformat për përdorim personal disa herë në ditë, janë më të prirur të raportojnë se ndihen të depresionuar sesa ata që e kufizojnë përdorimin e inteligjencës artificiale në zyrë.

"Nivelet më të larta të përdorimit të inteligjencës artificiale u shoqëruan me rritje modeste të simptomave depresive, me shanse për të paktën depresion të moderuar 30% më të mëdha tek ata që e përdorin çdo ditë, veçanërisht tek përdoruesit më të rinj", tha ekipi, duke i krahasuar efektet e përdorimit të tepërt me ato të vërejtura në mediat sociale.

"Përdorimi i përditshëm ose më i shpeshtë i inteligjencës artificiale ishte dukshëm më i zakonshëm tek burrat, të rriturit më të rinj, ata me arsim dhe të ardhura më të larta dhe ata në mjedise urbane", thanë studiuesit, duke përmbledhur zbulimet në anketë.

"Midis individëve të moshës 45 deri në 64 vjeç, shanset për të raportuar të paktën depresion të moderuar ishin 50% më të mëdha për përdoruesit e përditshëm të inteligjencës artificiale", shpjegoi ekipi, duke bërë thirrje për kërkime të mëtejshme mbi këtë çështje.

Gjetjet e anketës nuk tregojnë nëse përdorimi i inteligjencës artificiale është një simptomë apo shkak i mundshëm i depresionit.

Analizat e mëparshme kanë treguar se përdoruesit e inteligjencës artificiale duket se po tërhiqen nga angazhimi social dhe kanë tendencë të tregojnë varësi nga chatbot-et, thanë studiuesit, duke shpjeguar pse e kryen anketën e tyre.

Gjetjet vijnë pas publikimit të studimeve të shumta në vitet e fundit, që lidhin përdorimin e tepërt të mediave sociale dhe aplikacioneve të transmetimit me stresin dhe depresionin tek adoleshentët. / DPA News.