Ata që luajnë këtë sport popullor kanë më shumë gjasa të preken nga demenca

Një studim i Universitetit të Auckland-it ka zbuluar se meshkujt që kanë luajtur regbi në nivele të larta në Zelandën e Re kanë 22% më shumë gjasa të zhvillojnë Alzheimer ose demencë më vonë në jetë, krahasuar me popullatën e përgjithshme.

Ekipi analizoi të dhënat shëndetësore të gati 13,000 lojtarëve që konkurruan mes viteve 1950–2000 dhe i krahasoi me 2.4 milionë burra të së njëjtës moshë dhe etni. Në një ndjekje 35-vjeçare, 52 për 1000 burra në popullatën e përgjithshme u prekën nga sëmundje neurodegjenerative, ndërsa tek lojtarët shifra u rrit në 65 për 1000, një shtesë prej 13 rastesh.

Studimi tregoi se rreziku ishte më i madh për lojtarët profesionistë dhe ndërkombëtarë sesa për ata provincialë, si dhe për lojtarët e prapavijës, ku rreziku rritej sa më gjatë dhe më shpesh të luanin. Ndërsa lojtarët e vijës së parë nuk shfaqën të njëjtin model.

Sëmundjet shfaqeshin kryesisht pas moshës 70 vjeç. Autorët theksuan se rezultatet përputhen me gjetje të ngjashme nga SHBA-ja, Skocia dhe Italia, duke forcuar lidhjen mes sporteve me përplasje dhe dëmtimeve të trurit në moshë të vonë.

Sipas dr. Stephanie D’Souzës, kjo sugjeron një marrëdhënie të tipit “dozë–përgjigje”, ku si kohëzgjatja ashtu edhe intensiteti i lojës ndikojnë në rrezik. Diferencat sipas pozicioneve tregojnë se edhe natyra e kontaktit luan rol.

Studiuesit rekomandojnë kufizimin e ekspozimit të lojtarëve ndaj goditjeve në kokë, menaxhimin aktiv të tronditjeve dhe transparencë për rreziqet dhe përfitimet e pjesëmarrjes në sporte si regbia. / Scitech Daily - Syri.net