Berisha: Tano Caridi është lule para Ballës, shkuarja te vila e Agron Shehajt është akt i turpshëm

Kreu i Partisë Demokratike, Sali Berisha, komentoi vizitën e ministrit Taulant Balla pranë banesës së kreut të Partisë Mundësia, Agron Shehaj, duke e cilësuar atë si një akt të papranueshëm dhe jashtë çdo standardi institucional.

Berisha akuzoi Ballën për sjellje intimiduese dhe pretendoi se veprimi i tij është tregues i mënyrës se si, sipas tij, funksionon pushteti aktual.

Kreu i demokratëve deklaroi se çdo zyrtar apo politikan duhet t’i nënshtrohet vetëm procedurave ligjore dhe jo, sipas tij, presioneve politike, ndërsa hodhi akuza të forta edhe ndaj Taulant Ballës, duke e krahasuar atë me personazhe të njohur të mafias në kinematografi.

Besnik Kala: Përshëndetje Doktor, një pyetje në lidhje me kërcënimin e drejtpërdrejtë që Tao i bëri Agron Shehajt duke i shkuar tek vila ku kishte gruan dhe vajzat. A ju jep përshtypjen se ky lloj kërcënimi është tipik mafioz si ato të Tano Caridit?

Sali Berisha:

Tano Caridi është lule, Besnik, me çfarë është Edi Rama dhe Taulant Balla. 
Ai ishte një akt i shëmtuar, i turpshëm. 
T'i shkosh tjetrit te dera e shtëpisë pa një autorizim, ti shkel rëndë ligje dhe Kushtetutë. 
Në qoftë se shteti ka probleme me secilin politikan, shteti ka ligjet se si procedohet ndaj tyre dhe vendos gjykata për një akt të tillë. 
Kurse shkuarja e tij tregon totalisht se këtu është një shtet i kapur, një parti-shtet, një mafie e vërtetë. Çdo njeri duhet të hetohet në përputhje me procedurën ligjore. 
Tano Caridi kishte krime, po mos kujto se i ka Taulant Balla më të pakta krimet se Tano Caridi. 
Tano Caridi krimet i kishte në film, Taulant Balla i ka live, i ka reale, nga vrasjet tek krimet madhore elektorale, tek droga e të tjerë e të tjerë me radhë. 
Nuk ka krim me të cilin nuk është i mbrojtur ai.