‘Super e Marta’ në Bruksel nuk është në të vërtetë një ditë e mirë për integrimin.

Kështu shkruan gazeta gjermane ‘Frankfurter Allgemeine Zeitung’ duke iu referuar katër konferencave ndërqeveritare që u organizuan sot në kryeqytetin e BE me Malin e Zi, Shqipërinë, Moldavinë dhe Ukrainën.

Sipas kësaj gazete, vetëm Mali i Zi ka shpresa për integrimin, kurse për vendet e tjera nuk ka entuziazëm.

Sa i përket Shqipërisë, edhe kjo gazetë thekson se mbyllja e tre kapitujve të parë është thjesht një procedurë, pasi nuk ka pasur negociata për to.

“Brukseli foli të martën me entuziazëm për "Super Tuesday" ("Super të Martën"). Për herë të parë që nga viti 2002, në programin e një dite të vetme ishin planifikuar katër konferenca ndërqeveritare për zgjerimin e Bashkimit Evropian: me Ukrainën, Malin e Zi, Moldavinë dhe Shqipërinë.

Proceset përkatëse të anëtarësimit pa dyshim po marrin vrull, por, po të shihen më nga afër, tre nga katër shtetet nuk kanë arsye për entuziazëm. Vetëm Mali i Zi, vendi i vogël ballkanik, mund të ketë aktualisht shpresa reale për t'u anëtarësuar – megjithëse jo aq shpejt sa mendojnë disa.

Komisioni Evropian i ka ndarë 35 kapitujt e procesit të anëtarësimit – në të cilët legjislacioni i Bashkimit Evropian duhet të përfshihet në legjislacionin kombëtar – në gjashtë fusha tematike, të ashtuquajturat "klasterë" (clusters).

Klasteri i parë, që lidhet me çështjet themelore si shteti i së drejtës dhe lufta kundër korrupsionit, duhet të hapet i pari dhe të mbyllet i fundit. Vetëm pasi një vend të ketë përmbushur objektivat e ndërmjetëm në këtë fushë, kapitujt e tjerë mund të mbyllen përkohësisht. Këto janë rregullat në fuqi që nga viti 2020,” shkruan gazeta.

“Ndërkohë, Shqipërisë, shtet kandidat për anëtarësim, vendet anëtare i konfirmuan në fund të muajit maj se ajo i kishte përmbushur objektivat e ndërmjetëm në fushën e shtetit të së drejtës.

Për këtë arsye, të martën u bë e mundur që për herë të parë të mbylleshin përkohësisht tre kapituj: ai për shkencën dhe kërkimin, ai për arsimin dhe kulturën, si dhe ai për marrëdhëniet me jashtë.

Dy kapitujt e parë konsiderohen të lehtë, sepse legjislacioni i Bashkimit Evropian në këto fusha është relativisht i kufizuar, ndërsa përgjegjësia kryesore mbetet te shtetet anëtare,” thekson gazeta.